Автомашин ачдаг, дугуй түгждэг асуудлыг цэгцэлж иргэдийг хохиролгүй болгохоор ШӨХТГ зарим төрийн бус байгууллагуудтай хамтран ажиллаж эхэлжээ. Энэ талаар ШӨХТГ-ын дарга Т.Аюурсайханаас тодрууллаа.

-Төрийн бус байгууллагуудтай санамж бичигт гарын үсэг зурснаар иргэдийн хохирлыг барагдуулах боломжтой болж байгаа хэрэг үү?
-Манайх “Шударга төрийн төлөө” ТББ-ын тэргүүн Н.Чадраабал, Монголын хуульч эмэгтэйчүүдийн холбооны тэргүүн Б.Долгор нартай хамтран ажиллах санамж бичигт гарын үсэг зурлаа. Бид төрийн байгууллагын буруутай үйл ажиллагааны улмаас иргэдэд учирсан хохирлыг нөхөн төлүүлэх асуудлыг шүүхээр шийдвэрлүүлэх ажлыг хийнэ. Нийслэлийн Засаг даргын захирамжаар автомашин зөөж шилжүүлэх төлбөрийг хууль бусаар 70-80 мянган төгрөгөөр тогтоосны улмаас 9230 жолоочийг 647 сая төгрөгөөр торгож хохироосон зөрчлийг хяналт шалгалтаар тогтоосон. Мөн НИТХ-аас дугуй түгжих журам гаргаж 11700 жолоочийг 234 сая төгрөгөөр торгож хохироосон нь хууль бус юм.

-Торгуулийн мөнгө хаашаа ордог юм бэ?
-Автомашин ачдаг 14 компанийн 13 нь хувийн хэвшлийнх. Нэг нь Замын хөдөлгөөний удирдлагын төвийнх. Тэд нэг ч төгрөгийг улсын төсөвт оруулдаггүй. Торгууль мөртлөө хувийн компанид мөнгө нь орж байгаа энэ үйлчилгээ хууль бус гэдгийг харуулж байна.

-Торгуулсан иргэд ямар бичиг баримт бүрдүүлэн хаана хандах вэ?
-2013-2014 оны арван нэгдүгээр сар хүртэлх хугацаанд торгуулсан жолооч нар манай байгууллагад өргөдөл гарган хандах боломжтой. Харин автомашиныхаа дугуйг түгжүүлж 20 мянган төгрөгөөр торгуулж байсан бүх жолооч мөнгөө буцаан авах боломжтой.

Х.Хатан