Монголд Холливудын түвшний киноны цогцолбор байгуулах талаар Боловсрол, соёл, шинжлэх ухааны сайд Л.Гантөмөр АНУ-ын Холливудын төлөөлөгчидтэй ярилцжээ.

Уулзалтад БСШУЯ-ны Соёлын бодлого зохицуулалтын газрын дарга Д.Гантөмөр, "Hollywood film Academy"-ийн гэрээт төлөөлөгч "Cinemajic entertainment" компанийн захирал, продюсер Брэдли Хонг, Уолт Дисней компанийн харьяа ESPN, ABC, CBC, TS Turner Sport сувгуудыг үүсгэн байгуулагч, продюсер, Олимпийн зохицуулах продюсер Майкл Пёорл, Холивудын Тулааны урлагийн найруулагч, орлон тоглогч Эрик Чан, Өвөр Монголын Киночдын нийгэмлэгийн тэргүүн Нин Чай, Монголын кино урлагийн зөвлөлийн тэргүүн Д.Нямдорж тэргүүтэй төлөөлөгчид оролцсон байна.

"Hollywood film school Mongolia" ХХК нь Холливудын киноны сургуулийн сургалтын модулийг худалдаж аван Монголын кино урлагийн сургуулиудад нэвтрүүлэхээр ажиллаж байгаагаа энэ үеэр дуулгаж, БСШУ-ны сайдаас кино урлагийн сургалт явуулдаг төрийн өмчийн сургуулиудад дээрх модулийг нэвтрүүлэх зөвшөөрөл олгохыг хүсчээ.

Мөн Монголд Холливудын хэмжээний томоохон киноны цогцолбор байгуулж түүнийхээ харьяа кино урлагийн сургууль байгуулах, кино урлагийг дэмжих сан байгуулах, Уолт диснейг Монголд оруулж ирэхээр зорьж байгаагаа дуулган төрөөс тодорхой дэмжлэг үзүүлэхийг хүссэн байна.

Уулзалтын үеэр БСШУ-ны сайд Л.Гантөмөр "Та бүхнийг Монголд ирсэнд баяртай байна. Ялангуяа  Монголд Холливудын кино урлагийн сургалтыг нэвтрүүлж, сургууль байгуулах гэж байгаад их талархаж байна.

Та бүхний зорьж буй Монголд Холливудын хэмжээний томоохон кино цогцолбор байгуулах ажил болон сургууль байгуулах ажилд бодлогын хэмжээнд дэмжлэг үзүүлэх болно. Үүний тулд киноны хуулиа яаралтай хийх шаардлагатай байгаа. Кино урлагийг дэмжих сан байгуулах саналыг ч мөн их дэмжиж байна. Франц улсад жишээ нь нэг хүн 9 доллараар кино үзлээ гэхэд 1 доллар нь тэр сан руу орж байдаг. Манайд энэ зохицуулалт их хэрэгтэй. Бид үүнийг хуулиндаа тусгаж өгнө. Монголд Моливуд байгуулах тухайд та бүхэн кино цогцолборынхоо техник, эдийн засгийн үндэслэл, зураг төслөө бэлдээд ирвэл бид Засгийн Газарт санал тавьж, бүтээн байгуулалтад хөрөнгө оруулж болно" гэсэн байна.

Мөн Холивудаас 2016 онд "Чингис хаан" кино бүтээхээр зорьж байгаа бөгөөд зураг авалтын 20 хувийг Монголд хийхээр төлөвлөжээ.

Уулзалтын үеэр Хятадын Кино урлагийн төлөөлөгчид "Чингис хаан" киног Монголтой хамтран хийх хүсэлтэй байгаагаа мэдэгдээд, зөвшөөрлийн бичиг баримт бүрдүүлэхэд туслалцаа хүсч байгаагаа илэрхийлсэн байна.