Худалдаа, хөрөнгө оруулалтын ерөнхий хэлэлцээр (TIFA буюу ХХЕХ) сүүлийн долоон жил тасалдаад байсан юм. ХХЕХ-ийн хуралдаан нь хоёр орны уламжлалт хамтын ажиллагааг хоёр талын худалдааны хэд хэдэн асуудлаар гүнзгийрүүлэх боломж олгож буй гол хэрэгсэл аж.

Тодруулбал, ХХЕХ нь хамтын ажиллагааны орчин бүрдүүлэн, хоёр улсын худалдаа, хөрөнгө оруулалтын харилцааг сайжруулахад чиглэсэн олон төрлийн бодлогын чанартай асуудлаар хэлэлцэх боломжийг АНУ болон Монголын Засгийн газруудад олгож байгаа аж. Өнөөдөр болох хуралдааны үеэр худалдаатай хамааралтай хуулийн ил тод байдал, хөрөнгө оруулалтын орчны асуудал, худалдааг дэмжих үйл ажиллагаа, оюуны өмчийн эрх зэрэг хэд хэдэн гол асуудлаар хоёр орны төлөөлөгчид санал солилцох юм.

Худалдааны төлөөлөгчийн газрын дэд дарга, Элчин сайд Роберт Холлимэн II АНУ-ын төлөөлөгчдийн ахлагчийн хувьд хуралдааныг даргална. Тэрээр 2014 оны есдүгээр сард энэ албан тушаалд батлагдсан бөгөөд албан үүргийн хүрээнд БНХАУ, Энэтхэг, Төв болон Зүүн Азийн орнуудын худалдаа, хөрөнгө оруулалт, оюуны өмч, шинэчлэл, үйлчилгээ, хөрөнгө оруулалтын талаархи бодлогын зохицуулалт, худалдааны хэлцлийг хариуцдаг. Роберт Холлимэн АНУ-ын Гадаадын хөрөнгө оруулалтын хороонд (CFIUS) Худалдааны төлөөлөгчийн газраа төлөөлж буй гишүүн бөгөөд Хилийн чанад дахь Хувийн Хөрөнгө оруулалтын Корпорацийн (OPIC) захирлуудын зөвлөлд мөн алба хашдаг байна.

Айлчлалынхаа үеэр Элчин сайд Холлимэн Монгол улсын Гадаад хэргийн сайд Л.Пүрэвсүрэнд бараалхах бөгөөд Монголын талын төлөөллийг Гадаад хэргийн дэд сайд Н.Оюундарь ахлах аж.

Төгсгөлд нь хэлэхэд ХХЕХ-ийн талаарх хамтарсан хэвлэлийн бага хурал өнөөдөр 17:00 цагт Гадаад харилцааны яаманд болно.