Нийслэлийн хэмжээнд 2015 оны шилэг тохижилт, ногоон байгууламжтай, цэмцгэр байгууллага, аж ахуй нэгж шалгаруулах болзолт уралдаан зарлалаа. Тус уралдаанд нийслэлд үйл ажиллагаа явуулж буй 35 мянган аж ахуй нэгж, байгууллага оролцох бөгөөд дөрөвдүгээр сарын 20-ны өдрөөс есдүгээр сарын 25-ны өдрийг хүртэлх хугацаанд үргэлжилнэ.

Нийт 87 байгууллагыг шалгаруулан тус бүр 5 сая төгрөгөөр шагнаж, сайхан тохижилттой байгууллагын сурталчилгааг телевизээр гаргах юм байна.

Болзолт уралдаанд  төрийн болон төрийн бус байгууллага, эрүүл мэнд, боловсрол, соёл урлаг, банк санхүү, худалдаа, үйлчилгээ гэх мэт нийгмийн бүхий л салбарынхан хамрагдах бөгөөд энэ таван сарын хугацаанд төрөлх хотынхоо өнгө үзэмжийг сайжруулж, ногоон байгууламжийг нэмэгдүүлэх, иргэдийн ая тухтай ажиллаж амьдрах нөхцлөөр хангах олон талын ач холбогдолтой ажээ.

Тус уралдааныг зохион байгуулагчдын зүгээс дүүрэг, хороо болгонд ажлын хэсэг гарч ажиллаж, тухайн хороонд орших аж ахуй нэгжид шалгуур үзүүлэлтийг танилцуулан, зураг авч баталгаажуулах бөгөөд юуг янзалж тохижуулах тал дээр зөвлөмж өгч ажиллах гэнэ. Ингээд хоёр долоо хоног, нэг сарын хугацаанд тухайн байгууллагаа эргэж тойрох бөгөөд тохижилтын шинэчлэлт хийж байгаа эсэхэд хяналт тавьж, тухай бүрт зураг авч баталгаажуулах гэнэ.

Энэ уралдаанд үсчин, гуанз, машин угаалгын газар, төрийн бус байгууллага, зочид буудал, цэцэрлэг, сургууль гээд бүхий л газрууд хамрагдах аж.

Хэрвээ тухайн байгууллага ямар ч шинэчлэл хийлгүй, тааруу өнгө үзэмжтэй байгаа тохиолдолд ажлын хэсэг байгууллагын хаалган дээр ГАХАЙ наах гэнэ. Тухайн гахайг амархан салахааргүй наах тул, тэр дор нь хуулж авах боломжгүй гэв.

Харин тохижилтондоо анхаарч, орчноо цэвэр цэмцгэр болгон, тохижилт, гадаад үзэмжиндээ анхаарч ажилласан байгууллагын хаалган дээр ИНЭЭМСЭГЛЭЛ наах юм байна. Ингээд ажлын хэсэг тухай бүртээ үнэлгээ хийхж, шат дарааллан сонгон шигшиж, ирэх есдүгээр сард эдгээр байгууллагуудаас эцсийн шалгаруулалт хийж ялагчийг тодруулах ажээ.

Иймд байгууллага аж ахуй нэгжүүдийг энэхүү уралдаанд амжилттай оролцохыг уриалж байна.