Манай улсын зүүн гурван аймгийн олон сум түймэрт автаж, их хэмжээний газар нутаг шатаад байна. Тэр дундаа Дорнод аймгийн хойд захын Баян-Уул, Баяндун, Дашбалбар суманд Оросын нутгаас орж ирсэн түймэрт олон тооны мал, малын хашаа саравч шатсан бөгөөд түймэр одоо ч бүрэн унтраагүй.

Баян-Уул сумын тухайд нийт газар нутгийн 50 хувь нь түймэрт шатаж, сумын төв бүхэлдээ түймрийн утаагаар бүрхэгдээд байгаа юм.  

Хойд хөршөөс орж ирсэн түймрийн хохирлыг барагдуулах талаар хоёр улсын Засгийн газар хооронд ямар гэрээ хэлцэл байдаг, хэрхэн хариуцлага тооцох талаар Хууль зүйн сайд Д.Дорлигжаваас тодруулахад,

"Энэ бол олон жил яригдсан асуудал. Засгийн газар хоорондын комиссын хуралдаан, Хилийн уулзалтуудаар хил дээр зөрчил, гал түймэр гаргахгүй байх тухай байнга яригддаг. Гэхдээ шууд нэг нэгэндээ хохирол тулгах хоёр улсын хооронд хийгдсэн гэрээ хэлцэл байдаггүй. Хоёр тал тодорхой тохиолдолд тохирвол хийдэг, тохирохгүй бол хийдэггүй" гэв.