"Монголбанкны үйлчилгээний шимтгэлийн ерөнхий нөхцөл"-ийн талаар Монголбанкны ерөнхийлөгч Н.Золжаргал тушаал гаргасан. Энэ сарын 25-нд гаргасан уг тушаалаар АТМ-аас бэлэн мөнгөн авах шимтгэлийг бууруулсан гэх ташаа мэдээлэл зарим мэдээллийн хэрэгслээр гарч, иргэдийг төөрөлдүүлж байна.

Энэ талаар Монголбанкны хэвлэл мэдээллийн албаны дарга Ю.Гэрэлтуяагаас тодруулахад, Юуны өмнө Монголбанкны тогтоодог шимтгэл, хураамж болон арилжааны банкны тогтоодог шимтгэл, хураамж нь ялгаатай гэдгийг ойлгох нь зүйтэй.

Монголбанкны Ерөнхийлөгчийн тушаалаар батлагддаг “Монголбанкны үйлчилгээний шимтгэлийн ерөнхий нөхцөл” нь Төвбанкны төлбөрийн системийн оролцогч банк, Сангийн яамны Төрийн сангийн газар зэрэг байгууллагаас авч буй үйлчилгээний шимтгэл, хураамж юм. Олон улсын жишгээр Төв банк нь арилжааны банкны харилцах болон хадгаламжийн дансыг байршуулж, бусад банк, санхүүгийн байгууллагатай хийж буй төлбөр тооцоог дамжуулан боловсруулах, үйл ажиллагааны зөвшөөрөл өгөх зэрэг үйлчилгээ үзүүлдэг бөгөөд үүндээ шимтгэл, хураамж ногдуулдаг.

Тухайлбал, банк хоорондын шилжүүлэг, нэг банкны төлбөрийн картаар өөр банкны АТМ, ПОБ, ПОС төхөөрөмж ашиглан хийсэн гүйлгээ, гадаад валютын дотоод, гадаад төлбөр, шилжүүлэг дамжуулан боловсруулах, гадаад валют зузаатгах, тушаахтай холбоотой кассын үйлчилгээ үзүүлэх, банкинд нэмэлт зөвшөөрөл өгөх, банк түүний нэгж байгуулах зөвшөөрөл олгох зэрэг үйлчилгээг дурдаж болно.

-Арилжааны банкны бэлэн мөнгөний машинаас авах шимтгэл хураамжийн тарифыг хэн тогтоодог вэ?
-Арилжааны банкны шимтгэл, хураамж нь Банкны тухай хуулийн 11.3-т "Төлбөр тооцооны үйлчилгээний хөлсийг банк өөрөө тогтооно" гэж заасны дагуу банк нь иргэд, харилцагчдадаа үзүүлж буй үйлчилгээний шимтгэл, хураамжийг тооцоо, судалгаан дээр үндэслэн өөрөө тогтоодог.

Иймд арилжааны банкуудаас Монголбанкны авч буй үйлчилгээний шимтгэлийг иргэд үйлчилгээ авахдаа банкинд төлдөг шимтгэлээс ялгаж ойлгох нь зүйтэй гэлээ.