Унгарын Дебрецен хотод Иштван Бочкаин нэрэмжит Олон улсын “А” зэрэглэлийн 59 дэх удаагийн тэмцээн энэ сарын 4-7-ны өдрүүдэд боллоо. Энэхүү тэмцээнд манай улсыг төлөөлж боксын эрэгтэйчүүдийн шигшээ багийн 8 тамирчин хүч үзэж медалийн ургац арвинтай байлаа. 

Тэмцээнд 48 кг-ийн жинд оролцсон ОУХМ Г.Ган-Эрдэнэ мөнгөн медаль, 52 кг-ийн жинд спортын мастер А.Нурлан хүрэл медаль, 56 кг-ийн жинд ОУХМ Э.Идэрхүү алтан медаль, 64 кг жинд ОУХМ Б.Чинзориг алт, 69 кг-ийн жинд ОУХМ Б.Түвшинбат мөн алтан медаль, 81 кг-ийн жинд С.Эрдэнэбаяр хүрэл медалийг хүртлээ.

Манай улсын шигшээ багийн тамирчид гурван алт, нэг мөнгө, хоёр хүрэл медалийн амжилтаар тэмцээнд оролцогч 20 орноос багийн дүнгээр тэргүүллээ. Тус тэмцээний шилдэгийн шилдэг тамирчнаар Э.Идэрхүү шалгарсан байна.