“Ирээдүйн эздэд илгээх бэлэг 20000” бүх оддын гала тоглолт энэ сарын 11-нээс 17-ны хооронд болно. Монгол Улсын Филармоны уран бүтээлчид, үндэсний язгуур урлагийн “Алтай”, “Жонон”, Увертура, хип хоп урсгалын төлөөлөгчид, амьд хөгжмийн хамтлагууд нэгдэн ирээдүйн эзэд, хүүхэд багачуудад бага боловч баяр бэлэглэх хандивын тоглолтод нэгдээд байна.

Удахгүй болох шинэ жилийн баярыг тохиолдуулан хөгжлийн бэрхшээлтэй, хагас бүтэн өнчин, нэн ядуу хорин мянган хүүхэд, багачуудад баяр, баясал, инээд хөөр бэлэглэхээр уг тоглолтыг зохион байгуулж байгаа аж.

“Хүүхэд ирээдүйн эзэд” төрийн бус байгууллагаас зохион байгуулж буй уг үйл ажиллагааны хүрээнд есөн дүүргийн 152 хорооны 20 мянган хүүхдийг хамруулах юм.