Зохиолч сэтгүүлч Б.Шүүдэрцэцэгийн "Шүрэн бугуйвч" зохиолоор хийсэн кино өнөөдөр "Тэнгис", "Соёмбо" театруудад нээлтээ хийнэ. Тус кинонд гол дүрийн жүжигчнээс бусад нь мэргэжлийн бус жүжигчид тоглосон аж. Зохиолч уг киногоороо үнэнч хайр сэтгэл, эх оронч сэтгэлгээг гаргаж залууст үлгэр дууриалал болохыг эрмэлзсэн гэнэ. Уг киног "Cac picturs"-ийнхэн бүтээсэн байна. Энэхүү киноны гол дүрийг бүтээсэн СУИС-ын жүжигчний ангийн хоёрдугаар дамжааны оюутан Г.Золзаяатай цөөн хором хөөрөлдлөө.

-"Шүрэн бугуйвч" кино таны тоглосон анхны кино юу?
-Тиймээ, бүрэн хэмжээний уран сайхны кинонд анх удаа тоглож байна.

-Кинонд тоглох саналыг хэн тавьсан бэ?
-Зуны амралтаар манай сургуулийн тайзны ярианы багш надруу утасдаад "Тэнд нэг тийм киноны шалгаруулалт болж байна. Очоод шалгуулаад үз" гэсэн. Тэгээд багшийнхаа хэлсэний дагуу очоод пробонд ороод л гол дүрд тэнцсэн.

-Энэ дүрээр юу хэлэхийг зорьсон бэ? Дүрийг бүтээсэн хүний хувиар хариулахад?
-Энэ дүрийн хэлэх хамгийн гол санаа нь гэвэл хүн хайрынхаа төлөө юу хийж чадах вэ гэдэг л байгаа. Хүн үзээд "би өөрийн хайртай хүний төлөө байгаа бүхнээ зориулж чадах бил үү" гэсэн бодлыг тээгээд гарах байх л гэж бодож байна.

-Ер нь бүрэн хэмжээний кинонд анх удаа тоглож байгаа гэсэн. Энэ кинонд тоглоход хэцүү зүйл юу байсан бэ?
-Хэцүү зүйл гэх юм бол нэг их тохиолдоогүй.

-Хөгжилтэй зүйл их гарч байсан байх?
-Хүйтэн өдөр зураг авч байхад "өнөөдөр ямар сайхан дулаахан өдөр вэ" гэдгийг илэрхийлэх маягаар нимгэн хувцас өмсөөд л инээгээд явж байхад их нээдтэй байсан. Магадгүй хүндрэлтэй зүйл тэр ч байсан байж магад.

-Урьд нь ер нь "Шүрэн бугуйвч" гэдэг зохиолыг уншиж байсан уу. Кино зохиол, тууж хоёр ялгаатай болсон уу?
-Туужийг уншиж байсан. Мэдээж кино болгох гэж байгаа юм чинь тэр чигээр нь хийж болохгүй л дээ. Кино зохиол болгож бичихдээ жаахан хэсгүүдийг өөрчилсөн болохоос хэлэх санаа, гол үйл явдал бол хэвээрээ л байгаа.

Н.Пунцаг