Байнгын ганцаардал нь эрүүл мэндэд тамхи татах, таргалахтай адилхан хортой гэж шинжээчид нотолж байна. Шинжлэх ухааныг урагшлуулах Америкийн нийгэмлэгийн жил тутмын бага хурал дээр ийм мэдэгдэл хийснийг Британийн олон нийтийн мэдээллийн хэрэгслүүд мэдээлж байна.

Төрөл төрөгсөд, ойр дотны хүмүүсээсээ байнга хол байх нь цусны даралтыг ихэсгэж, дархлааны тогтолцоог сулруулдаг гэж сэтгэл судлаач Жон Качиоппо хэлжээ. Үүний зэрэгцээ, ганц бие хүмүүс нойрондоо муу, бас оюуны хомсдол өвчин тусах эрсдэлд өртөмтхий байдаг байна.

Ганц бие хүмүүст ямар нэг шалтгаанаар ажиглагддаг кортизол гэдэг гормоны тоо ихэсгэдэг нь цусны даралт ихэсгэж,  хүний зүрхний өвчин хөдлөх болон унадаг өвчин тусах аюулд хүнийг оруулдгийг Качиоппо илрүүлжээ. Нийгмийн хувьд идэвхтэй хүмүүсийг бодвол, ганц бие хүмүүст зүрхний өвчин хөдлөх эрсдэл гурав дахин, харин зуурдаар нас барах магадлал хоёр дахин их байдаг байна. «Насжих тусам бие махбодь хүчээ эрч хүчээ алддаг, ганцаардал үүнийг улам гүнзгийрүүлдэг» гэж Качиоппо ярьж байна.

Ганц бие хүмүүс болон бусадтай байнга харилцдаг хүмүүсийн эрүүл мэндийн ялгаа нь тамхи татдаг, татдаггүй хүмүүс, түүнчлэн тарган хүмүүс болон биеийн бэлтгэл сайтай хүмүүсийн ялгаа шиг тийм их байдгийг судалгаа харуулжээ.

Олон хүн Интернэтийг бусадтай харьцахаас илүүд үздэг өнөөгийн дэлхий ертөнцийн байдалд үнэлэлт дүгнэлт өгөхөд олж авсан мэдээ сэлт нэн чухал юм гэж профессор Жон Качиоппо тэмдэглэсэн байна. «Бид аймшигтай ганцаардалд аж төрж байна. Бид хожуу гэрлэж, цөөн хүүхэд төрүүлж, улмаар ойр дотны гэх цөөн хүнтэй байдгаас ганцаардлын түвшин ихсэж байна» гэсэн гунигт дүгнэлтийг эрдэмтэн хийжээ.

Я.Сүхбаатар