Украины Ерөнхийлөгч Петр Порошенко улсын зүүн бүс нутгууд болох Донецк, Луганск мужид 3 жилийн хугацаагаар онцгой эрх олгох хуулинд гарын үсэг зурлаа. Тус хууль нь гарын үсэг зурсан өдрөөс эхлэн хүчин төгөлдөр болох юм.

Энэ хуулийн гол зорилго нь Донбассын оршин суугчдыг буцаан авчирах, тэднийг аюулгүй орчинд амьдрах бололцоог бий болгох, эдгээр газруудын дэд бүтэц, амьжиргааг нөхөн сэргээх гэж Украины Ерөнхийлөгчийн албан ёсны цахим хуудсанд бичжээ.

Хуулийн дагуу зүүн өмнөд нутагт болж буй байлдаанд оролцогсдыг эрүүгийн хариуцлагаас чөлөөлөх гэнэ. Донецк, Луганск мужид дэгдсэн зөрчилд оролцсон хүмүүсийг мөрдөж мөшгих, хэрэгт татахыг хоригложээ.

Өршөөл хүн бүхэнд хамаарахгүй бөгөөд сэжигтнүүд болон хэрэг үйлдэн шүүхээр яллагдан шийтгэгдэгсдэд огтхон ч хүртээлгүй юм. Мөн энэхүү өршөөл нь “ноцтой гэмт хэрэг” үйлдэгсэд болон хууль хүчин төгөлдөр болсны дараа зэвсгээ хаяагүй этгээдүүдэд хамаарахгүй гэжээ. Хэнийг өршөөхөө “дэлхийн хамгийн шударга Украины шүүх” шийдэх юм гэнэ. “Боинг-777”-ийн сүйрэлд буруутай гэмтнүүдэд өршөөл хамаарахгүй аж.

Онцгой эрх олгосны дагуу орон нутгийн ээлжит бус сонгуулийг ирэх арванхоёрдугаар сарын 7-нд явуулахаар товложээ.
Донбасс эдийн засгийн онцгой бүс байх боловч түүний эдийн засгийг Украины төсвөөр сэлбэж өгч байх юм.

Өнгөрсөн есдүгээр сарын 16-нд Украины Рада буюу парламент Донецк, Луганскэд онцгой эрх өгөх тухай хуулийн төсөл батлагдсан юм.  

Эх сурвалж: ВВС