Эдийн засгийн нөхцөл байдал хүндэрч, төсвийн орлого их хэмжээгээр тасалдаж эхэлсэнтэй холбогдуулан Засгийн газраас зохих ажлуудыг хийж эхэлсэн. Үүний нэг нь гурван өдөр үргэлжлэх Бизнесийн дээд хэмжээний уулзалт юм.

Өчигдөр уулзалтыг нээсэн Ерөнхий сайд ирсэн зочдод “Бид хамтрагчид шүү” гэсэн санаагаа илэрхийлсэн.

Өнөөдөр өглөө Ерөнхийлөгч эдийн засгийн гол тулгуур болох хувийн хэвшлийнхнийг бүх талаар нь дэмжихээ илэрхийлсэн. Энэ мэтээр эрх баригчид гадны хөрөнгө оруулагчдыг ахин татахаар их л хичээж байна.     

Ерөнхийлөгчийн ахлах зөвлөх П.Цагаан “Энд Монголд анх удаа ирсэн хүн олон байна. Та нар зөв газраа ирсэн шүү. Сүүлийн хэдхэн жилд манай ДНБ 10 дахин өссөн. Ирэх 20 жилд бид 10аас 100 тэрбумын эдийн засагтай орон болно. Хэрэв манай эдийн засаг хоёр оронтой тоогоор өссөн хэвээр байвал бид энэ зорилгодоо хүрч чадна. Тэгэхээр хурдацтай хөгжих оронд хөрөнгө оруулах нь том боломж” гэлээ.

Мөн тэрээр судлаач Даниэл Алтманы бүтээлийг иш татан, “Хаана хөрөнгө оруулж болох вэ” гэсэн жагсаалтад Монгол Улс эхний аравт орсныг дуулгалаа.