Дорнод Дээд Сургуульд хөдөө, орон нутгийн их, дээд сургуулиудын эрдэмтэн, судлаачид цугларан, судалгааны илтгэлээ хэлэлцүүлэн, цаашид хэрэгжүүлэх арга хэмжээний талаар зөвлөмж гаргасан байна.

Улаанбаатар хот болон 8 аймаг, гадаад, дотоодын нийт 120 гаруй зочид төлөөлөгч оролцон, "Орон нутаг дахь их, дээд сургуулиудын нийгмийн тулгамдсан асуудал", "Орон нутаг дахь их дээд сургуулиудын боловсролын шинэчлэлийн асуудал", "Орон нутаг дахь их, дээд сургуулиудын эдийн засаг, менежментийн асуудал" гэсэн 3 салбар хуралдаанаар нийт 30 гаруй илтгэл хэлэлцэгдэн, санаа бодлоо хэлсэн байна.

Орон нутагт үйл ажиллагаагаа явуулж буй их, дээд сургуулийн сургалтын чанарыг дээшлүүлэхэд бүс нутгийн болон улсын хэмжээнд хэрхэн арга хэмжээ авах, орон нутагт хэрэгцээ шаардлагатай ямар мэргэжилтэн цаашид бэлтгэх, орон нутгийн их, дээд сургуульд ажиллаж байгаа багш нарын цалин, нийгмийн хамгааллын орчныг сайжруулах, оюутнуудад үзүүлэх үйлчилгээний чанар, хүртээмжийн өсөн нэмэгдүүлэх, сургуулиудын сургалтын орчинг дээшлүүлэх чиглэлээр олон санал зөвлөмжийг гарган холбогдох шатны байгууллагуудад хүргүүлэхээр болсон байна.

Тус хурлыг Дорнод дээд сургууль Азийн хөгжлийн банкны Дээд боловсролын шинэчлэлийн төслийн дэмжлэгтэйгээр зохион байгуулсан бөгөөд Монголын дээд боловсролын чанарын баталгаажуулалт сэдвээр төслийн зөвлөхүүд болон БМИҮЗөвлөлийн ажлын албаны мэргэжилтнүүд 1 өдрийн сургалтыг зохион байгуулжээ.

Эрдэм шинжилгээний хуралд ШУА, БШУЯ, Боловсролын магадлан итгэмжлэлийн үндэсний зөвлөл, Дээд боловсролын шинэчлэл төсөл, Дархан, Эрдэнэт болон ОХУ-ын Буриад улсын Багшийн коллеж, ЭМШУИС-ийн Дорноговь салбар, Ховд Их Сургууль, МУБИС, Завхан МУИСургууль, ЭМШУИС-ийн Говь-Алтай аймаг дахь салбар сургууль, МУБИС-ийн Архангай аймаг дахь Багшийн сургууль, Сүхбаатар аймгийн төлөөлөгчид, эрдэмтэн судлаачид оролцсон чухал ач холбогдолтой хурал болж өнгөрлөө.

Хуралд Дорнод аймгийн засаг дарга С.Ганбат, БШУЯамны Дээд боловсролын хэлтсийн дарга П.Эрхэмбулган, БМИҮЗ-ийн дэд дарга Х.Батсайхан нар хурлын үйл ажиллагаанд амжилт хүсч үг хэллээ.

Зүүн бүсийн их сургууль, сургалт судалгааны томоохон төв болон өргөжих зорилгыг тавин ажиллаж байгаа  доктор О.Янжмаа захиралтай хамт олон амжилттай зохион байгуулжээ.

Тус хурлыг ирэх жил ЭМШУИС-ийн Дорноговь салбар сургууль зохион байгуулахаар болжээ.

Эх сурвалж: www.batsaikhan.mn