Өнөөдрийн байдлаар /2014.05.18/ Хангайн нуруунаас эхтэй Идэр, Чулуут, Чигэстэй, Буянт, Онги, Хэнтэй нуруунаас усжих Туул, Хэрлэн голын адаг болон Их Хянганы нуруунаас эхтэй Халх голын дагууд усны түвшин өмнөх өдрийнхөөс 10-25 см нэмэгдсэн байна.

Хангай нурууны өврийн Тээл, Хомын хоолой болон Хэнтий нурууны зүүн хажуугийн Хэрлэн гол Мөнгөнморьт сум орчимд үерийн түвшинг 5-20 см, Хангай нурууны арын Идэр, Урдтамир, өврийн Буянт, Хожуул, Завхан, Байдраг, Онги, Хэнтий нурууны баруун хажуугийн Хүдэр, Шарын гол, Ерөө, Тэрэлж, Улиастай, Туул, зүүн хажуугийн Хурх, Барх, Онон, Хэрлэн, Халх гол болон Алтай нурууны Буянт, Увс нуурын савын Хархираа, Түргэн, Сэлэнгэ мөрний дунд болон адаг хэсгээр олон жилийн дундаж түвшинг 10-45 см тус тус давсан байна.

Иймд дээр дурьдсан гол мөрний сав газраар нутаглаж буй малчид, ард иргэдийг үер усны аюулаас сэрэмжтэй байхыг Цаг уур, орчны шинжилгээний газраас онцгойлон анхааруулж байна.