БНХАУ-ын иргэн Вэнь Шин /Wenxin/-ий Монгол Улсад гэр бүлийн шалтгаанаар оршин суух зөвшөөрлийг сунгахаас татгалзан, сайн дураар гарах сануулгыг Иргэний харьяалал, шилжилт хөдөлгөөний ерөнхий газраас өгчээ.

Вэнь Шинь нь 1968 оны наймдугаар сарын 08-нд БНХАУ-д төрсөн, G15054962 дугаарын паспорттай, Монгол Улсад 1992 онд суралцахаар ирсэн байна. МУИС-ийн ОУХДС-д 1992-1997 онд суралцаж төгсөөд Монгол Улсын иргэнтэй 1994 оноос хамтран амьдарч, 1998 онд гэрлэлтээ батлуулжээ.

Эднийх 1995 онд төрсөн нэг охинтой. Эхнэр нь 1999 оноос Франц улсад суурьшиж, 2010 онд өвчний улмаас тус улсад нас барсан бөгөөд охин нь 2002 оноос хойш Франц улсад амьдарч байгаа аж.

Вэнь Шин нь 1999 оноос гэр бүлээсээ тусдаа амьдарч байгаа боловч түүнээс хойш Монгол Улсад хувийн хэргээр оршин суух хугацаагаа сунгуулахаар удаа дараа хандахдаа зөвхөн гэр бүлийн шалтгаанд үндэслэж байжээ.

Монгол Улсад сурч боловсрох, ажил хийх, аж ахуй эрхлэх, хөрөнгө оруулах, хувийн хэргээр оршин суух зэрэг олон талын боломж хуулиар бүрэн нээлттэй байдаг боловч тэрбээр 1999 оноос хойш 15 жилийн хугацаанд тэр бүх бололцоог ашиглаагүй, олон төрлийн сонголт, хувилбарт үндэслэсэн өргөдөл хүсэлт гаргаагүй байна.

Гэр бүлийн шалтгаанаар оршин суухаа больсон, Гадаадын иргэний эрх зүйн байдлын тухай хууль зөрчин худал мэдүүлэг өгсөн нь сайн дураар гарахыг сануулах, улмаар хууль хэрэгжүүлэх бусад бодит шаардлагыг үүсгэсэн гэж албаныхан үзэж байна.

Вэнь Шин өнгөрсөн хугацаанд Монгол Улсын харьяат болох болон цагаачлах хүсэлт өргөдлөө албан ёсоор нэг ч удаа гаргаж хандаагүй аж.

Хятад улсын иргэн тэрбээр өргөдөлдөө хуулийн байгууллагын ажилтнуудтай холбоотой тодорхой мөнгө төгрөгийн асуудлыг дурдсан тул энэхүү мэдээллийг шалган тогтоох зорилгоор Монгол Улсаас сайн дураар гарах шийдвэрийг түр хойшлуулж байна.

Албан ёсны бичиг баримтын бүртгэлээр БНХАУ-ын иргэн Вэнь Шин гэдэг хуулийн этгээд мөн тул Норовцэрэнгийн Алхаа гэх албан бус овог, нэрээр харилцах, шийдвэр гаргах хууль эрх зүйн боломжгүй гэж үзжээ.