Эрүүл мэндийн сайд Н.Удвал өнөөдөр Шинэчлэлийн Засгийн газрын 11-11 төвд ажиллалаа. Иргэд сайдад хандаж эрүүл мэндийн тусламж үйлчилгээтэй холбоотой олон асуулт тавьсны нэг нь бөөрний дутагдал өвчтнийг эмчлэх хиймэл бөөрний аппарат дутагдалтай байгаа тухай асуулт. Хиймэл бөөрний эмчилгээ хийх диализын аппарат хүрэлцээгүй байгааг хэрхэн шийдэх вэ? гэсэн асуултад Н.Удвал сайд хариулт өгөв.

“Өнөөдөр Улсын нэгдүгээр төв эмнэлэгт диализын 20 гаруй аппарат бий. Үүн дээр Улсын гуравдугаар төв эмнэлэг, ЭХЭМҮТ, Орхон аймгийн Бүсийн оношлогоо, эмчилгээний төвд ийм аппараттай болсон.

Улсын хэмжээнд хиймэл бөөрний эмчилгээ хийлгэх шаардлагатай 500 гаруй өвчтөн бий. Ийм тохиолдолд улсын хэмжээнд нэн даруй 120 аппарат хэрэгтэй байна. Энэ жил төсвийн хөрөнгөөр 20 аппарат авна. Нэмж Концессийн гэрээгээр аппарат авах ажлыг гүйцэтгүүлэх тухай саналаа УИХ-д өргөн барьсан” гэж ярилаа.

Диализын хамгийн олон аппараттай Улсын нэгдүгээр төв эмнэлгийн Хиймэл бөөрний тасагт 150 гаруй хүн эмчлүүлж байна. Манай улсын хүйтэн сэрүүн уур амьсгалтай  холбоотой бөөр, шээсний замын өвчлөл түгээмэл байдаг.

Тиймээс Эрүүл мэндийн яамнаас Бөөр хамгаалах хөтөлбөр хэрэгжүүлж байгаа. Энэ хөтөлбөрийн хүрээнд бөөр хамгаалах, бөөрний өвчнөөс сэргийлэх шинжилгээг хийдэг болно. Шээсэндээ тест дүрж, бөөрний үйл ажиллагаа ямар байгаад хялбархан дүгнэлт хийх боломжтой оношлуурыг улсын хэмжээнд бүх өрх, сумын эмнэлэгт тараахаар төлөвлөжээ. Энэ ажилд 1.8 тэрбум төгрөг төсөвлөсөн байна.