Сүүлийн өдрүүдэд долларын ханш байнга өссөөр ирсэн. Өнөө өглөө гэхэд 1795 төгрөгт хүрч, иргэдийн уур бухимдал дээд цэгтээ хүрсэн юм. Энэ нь арилжааны банкуудаас доллараар зээл авсан иргэд болон гадаад худалдаа эрхэлдэг аж ахуйн нэгжүүдийн үйл ажиллагаанд сөргөөр нөлөөлж байсан.

Гэтэл өнөөдөр 16 цагийн үед тэнгэрт тулсан ханш эргээд гэнэт уналаа. Арилжааны банкуудын долларын ханш 1795-аас 1750 болж хоорондоо хэлэлцэж тохиров уу гэмээр зэрэг шахуу буужээ. Иймд банкуудыг зүг чигээ болгодог Найман шарга дах валют солих цэгүүд ханшаа дагаад бууруулан 1745 төгрөгөөр зарж, 1720 төгрөгөөр авч байна.

Харин Монгол банкны цахим хуудсанд ам долларын хаалтын ханш 1787 төгрөг байна.  

Монгол банкны ерөнхийлөгч Н.Золжаргал өнөөдөр “Ерөнхий сайдын 30 минут” уулзалтад оролцон, ам долларын ханшийг цаашид нэмэхгүй байх боломжтой гэсэн юм. Ямартай ч түүний амлалт өдөртөө биеллээ. Харин гэнэт буусан ханш эргээд өсөх үү эсвэл аажмаар буух уу гэдгийг харах л үлдэж байна.