Хавар болохоор оношилгоонд орох тээврийн хэрэгслүүдийн тоо эрс өсдөг. Иймд 3-6 сарын хооронд үүсдэг ачааллыг бууруулах зорилгоор нийслэлийн оношилгооны төвүүд энэ оны нэгдүгээр сарын нэгнээс уртасгасан цагаар ажиллаж байна. Харин 21 аймаг дах оношилгооны төвүүд хэвийн цагийн хуваариар ажиллаж байгаа юм.  

Авто машин эзэмшигч бүр жилд нэг удаа зам ашигласны төлбөр төлж, тээврийн хэрэгслийн татвар төлдөг. Татвараа зургадугаар сарын нэгний дотор төлсөн байх ёстой.

Харин иргэдэд татвар, даатгалаас өмнө л оношилгоонд амжиж орох ёстой гэсэн нийтлэг, буруу ойлголт байдаг. Гэтэл авто тээврийн үзлэг бүтэн жилийн турш үргэлжилдэг. Оношилгооны төвүүд тодорхой хугацаанд аян зохион байгуулах нь элбэг байдаг тул иргэд оношилгоо эхлэх, дуусах хугацаатай гэж ташаа ойлгодог байна.

Нийслэлийн Баянзүрх, Баянгол, Сонгино Хайрхан дүүргүүдэд оношилгооны гурван төв бий. Тэд өглөө наймаас хорин цаг хүртэл цайны цаггүй ажиллаж байна. Мөн амралтын өдрүүдэд 9-19 цагийн хооронд ажиллаж байгаа юм.

Нийслэлд оношилгооны, гурван явуулын машин бий. Эдгээр машинууд Багахангай, Багануур зэрэг алслагдсан дүүргүүдэд ажилладаг. Харин энэ өдрүүдэд явуулын машинууд цагдаагийн постууд дээр ажиллан, шугам замын шалгалт хийж байна. Өөрөөр хэлбэл хөдөлгөөнд оролцож байгаа тээврийн хэрэгслүүдийг зогсоон, газар дээр нь хэмжилт хийж байгаа юм.  

Замын хөдөлгөөнд оролцох эрхийг баталгажуулсан 2015 наалт авахад суудлын автомашин эзэмшигч 10.000, ачааны авто машин эзэмшигч 15.000 төгрөгийн төлбөрийг жилд нэг удаа төлөх юм.

Б.Чимгээ