УИХ дахь МАН-ын бүлэг хуралдаж байна. Ерөнхий сайд Л.Оюун-Эрдэнэ Оюутолгойн асуудлаар бүлгийн хуралдаанд мэдээлэл өгчээ. 

Ерөнхий сайд Л.Оюун-Эрдэнэ: Рио Тинто болон Туркойз хилл компанийн гүйцэтгэх удирдлагаас Ерөнхий сайдын нэр дээр хандан таван санал бүхий албан бичиг илгээсэн.

Нэгдүгээрт, Оюу толгойн төслийн  34 хувьд ноогдох 2.4 тэрбум ам.долларын зээлийг 100 хувь тэглэж байна. Ингэснээр өмнө нь тооцоолж байсан 22 тэрбум ам.долларын өр үүсэхгүй. Үндсэндээ 34 хувийг Монголын ард түмэн үнэгүй авч байна гэсэн агуулгатай. 

Хоёрдугаарт, далд уурхайн бүтээн байгуулалтын санхүүжилтийн төлөвлөгөөг энэ захидал илгээсэн өдрөөр цуцалж дуусгавар болгож байна.

Гуравдугаарт, Оюу толгойн далд уурхайн бүтээн байгуулалтын санхүүжилтийн зарцуулагдсан дүнд Засгийн газар хөндлөнгийн аудит оруулах хэрэв зөрүү үүсвэл хариуцаж төлөхөд бэлэн буйгаа илэрхийлсэн.

Дөрөвдүгээрт, Гүний уурхайг 2023 оны нэгдүгээр хагаст ашиглалтад оруулахаар тооцож буй. Энэ хүртэлх хөрөнгийг хөрөнгө оруулагч тал 100 хувь хариуцна.

Тавдугаарт, байгаль орчин, эрчим хүчний салбарт хамтарч ажиллахаа илэрхийлсэн. Мөн УИХ-ын 92 дугаар тогтоолыг хэрэгжүүлсэн гэлээ. Гүний уурхайг ашиглалтад оруулах асуудал ажлын хэсгийн түвшинд шийдэгдвэл 2022 оны нэгдүгээр улиралд бүтээн байгуулалтын ажлыг эхлүүлэхэд бэлэн байна гэсэн захидлыг илгээсэн.

Захидлыг бүрэн эхээр нь ЭНД дарж үзнэ үү.

Ц.ДАВААСҮРЭН: МАНАЙ УЛС БАЯЛГАА ҮНЭТЭЙ АВЧ БАЙСАН 34 ХУВИА ТЭГЛҮҮЛЖ ЧАДЛАА

УИХ-ын гишүүн Ц.Даваасүрэн: 

Олон жил бид Оюутолгойн асуудлаар маргалдсан. Үр дүн гардаг юм байна гэдэг нь харагдлаа. Хамгийн  гол нь УИХ, Түр хороо, Засгийн газар нэг талд гардаг байсанд ач холбогдол оршиж байна. Өмнө нь Засгийн газар нөгөө талдаа гарчихдаг бидний өмнөөс чулуу шидээд байсан. Засгийн газарт тууштай байсанд талархал илэрхийлье.

Улс төр бизнесийн бүлэглүүд, манай намын зарим нөхөд холбогдсон, төвөгтэй асуудал байсан. Улс төрийн зориг шаардсан ажил байлаа. Манай улс баялгаа үнэтэй авч байсан 34 хувиа тэглүүлж чадлаа. 

Хоёрдугаарт, Дубайн гэрээг цуцаллаа. Цуцлахдаа дагаж ирсэн зээлийг чинь авах шаардлага байсан уу, авсан уу гэдгийг хөндлөнгийн аудит оруулж шалгая. 

Гуравдугаарт, Далд уурхай ашиглалтад ортол нэмэлт санхүүжилтийн  асуудлыг хөрөнгө оруулагч өөрөө шийдье гэсэн.

Б.СОЛОНГОО: ЦААШИД ЯРИА ХЭЛЭЛЦЭЭ ҮРГЭЛЖИЛНЭ

Хууль зүй, дотоод хэргийн дэд сайд Б.Солонгоо сэтгүүлчдийн асуултад хариуллаа. Тэрбээр "Яриа хэлэлцээ үргэлжилж байна. Өнгөрөгч аравдугаар сарын 21-нд Хууль зүй, дотоод хэргийн сайд Х.Нямбаатарын нэр дээр Рио Тинто компанийн зүгээс албан бичиг ирж байсан. Тухайн үед ирүүлсэн саналд манай 34 хувьд ноогдох өрийг 70 хувийг буюу 1.6 тэрбум ам.долларыг тэглэх санал ирүүлсэн. Манай зүгээс 11 дүгээр сард яриа хэлэлцээг үргэлжлүүлж өрийг 100 хувь тэглүүлэх шаардлага тавьсан. Манай саналыг хүлээн авч байна.

Гэхдээ яриа хэлэлцээ үргэлжилнэ. Говийн бүсэд гүний ус ашиглах болон байгаль орчны нөлөөлөл зэрэг асуудлыг хэлэлцэнэ. Түүнчлэн далд уурхайн бүтээн байгуулалт, санхүүжилт буюу Дубайн гэрээг ямар нөхцөл байдалтайгаар цуцлах вэ, мөн хөрөнгө оруулагчдын гэрээнд ямар өөрчлөлт оруулснаар цаашид маргаан үүсэхгүй байх вэ гэдгийг хэлэлцэнэ" гэлээ.

Б.БАТ-ЭРДЭНЭ: БИДНИЙ ОЛОН ЖИЛ ЯРЬСАН ДУБАЙН ГЭРЭЭГ ХҮЧИНГҮЙ БОЛГОХ ГЭЖ БАЙНА

УИХ-ын гишүүн Б.Бат-Эрдэнэ:  

Дэлхийд 3-т орох том баялгаа гадаадуудад алдчихаад, зүгээр алдаад зогсохгүй өөрсдөө 22 тэрбум долларын өрөнд ороод дуусахаар хүнд нөхцөлтэй тулгарсан. 

Үүний эх суурийг хэзээ тавьсныг та бүхэн сайн мэдэж байгаа. Энэ бол 2008 оноос яригдсан. Тухайн үед хүч сул байсан. Иргэний хөдөлгөөнүүд, иргэд төв талбай дээр энэ асуудлыг тавьж, УИХ-ын танхимаас 57 дугаар тогтоолыг баталсан. 57 дугаар тогтоолд 34 хувь, цаашлаад Монголын талын эзэмших хувь хэмжээг 50-иас доошгүй хувьд өргөх зарчмын заалттай тогтоол бий. 

Ерөнхий сайд, УИХ-ын даргатай уулзсан. Өнөөдөр иргэд, УИХ-ын дарга, Ерөнхийлөгч, Засгийн газар, УИХ нь нэг ойлголттой байж л үр дүн гарлаа. 

Саяхан Ерөнхий сайдын хүсэлтийн дагуу Рио Тинтогийн гүйцэтхэх захирал Якоб Стаусхолм бүх захирлуудын хамт ирж уулзсан. 
"Энэ гэрээ эхнээсээ буруу замаар эхэлсэн учраас бид өнөөдөр ийм байдалд ороод байна. Үүнийг бид ойлгож байна. Эхнээсээ зөв тавьсан бол ийм байдалтай бид уулзахгүй байсан. Өнөөдөр та бүхэн ямар ч хатуу ширүүн үг хэлсэн бид хүлээж авна" гэж гүйцэтгэх захирал нь хэлсэн. Ерөнхий сайд, УИХ-ын даргатай уулзсан. Өнөөдөр иргэд, УИХ-ын дарга, Ерөнхийлөгч, Засгийн газар, УИХ нь нэг ойлголттой байж байж л үр дүн гарлаа. 22 тэрбум долларын өртэй болгох гээд байгаа 34 хувийн 2,4 тэрбумын өрийг тэглэх гэж байна. Бидний олон жил ярьсан Дубайн гэрээг хүчингүй болгох гэж байна. Үүний төлөө 2008 оноос тууштай тэмцсэн.