Нас бол тоо... Энэ үгийн үнэ цэнэ, утга учрыг зөвхөн түүнээс л ухаарч, суралцмаар.

Өдий 90 насны босгон дээр ирсэн ч сэтгэлгээ нь үргэлжид залуугаараа.

Орос бүсгүйн харцанд зүрхээ нэвт сүлбүүлж, анхны хайрын бодолд мансуурч явахдаа үертэй гол руу живэхээ мэдэхгүй давхиж орсон тэр залуу өдгөө өндөр настай өвөө болсон ч өнөөдөр “18-тай” хэвээр.

Энэ эрхэм бол Монгол Улсын ардын жүжигчин, Хөдөлмөрийн баатар Г.Хайдав.

Биедээ багтамгүй эрч хүч, сэтгэлийн тэнхээг агуулж явдаг, монгол түмний хүндтэй хүн Г.Хайдав гуай “Монгол тулгатны зуун эрхэм ” нэвтрүүлгийн шинэ дугаарын зочноор оролцлоо.



“Ганган хайдав” хэмээн нэрлэгдэж тухайн үеийнхээ сор болсон залууд ээж нь “Өмсгөлдөө хайртай байгаарай”, “Аливаа бүхнийг бүү хэтрүүл” гэж захидаг байжээ.

Ээжийнхээ захиасыг ягштал баримталж ирсэн нь Г.Хайдав гуайг өнөөдрийн өндөрлөгт хүргэсэн гэх.

Түүнчлэн “мөнхийн залуу” яваагаа сүүлний годон иддэгтэй холбоотой хэмээн тайлбарлав.

“Сүүлийг бүхлээр нь бус годон талын хэсгийг идвэл биед сайн. Годон амин дэмээр хамгийн баялаг” гэж ярьсан нь орчин үеийн бидэнд сонирхолтой мэдээлэл байлаа.

Үзсэн хүн бүр эрч хүчийг авах энэ нэвтрүүлгээс Та бүхэн Г.Хайдав гуайн дотоод сэтгэлд нуугдаж буй эцэг хүний үрээ гэх хайрыг мэдэрч, сэтгэлийн чанадад нуугдаж буй нандин дурсамж, дурдатгал руу нь өнгийх боломж олдож байна.



Уярал, ухаарал, амьдралын утга учрыг хүүрнэн өгүүлэх тус нэвтрүүлэг Үндэсний портал GoGo.mn сайтын GoGoTv буланд нэмэгдэн орлоо.

“Монгол тулгатны зуун эрхэм ” нэвтрүүлгийн шинэ дугаарыг үзэх бол энд дарна уу.