Урьдчилсан дүнгээр 18 дугаар тойрог буюу Хэнтий аймгийн нөхөн сонгуульд МАН-аас нэр дэвшигч Ц.Идэрбат нийт 17264 сонгогчийн санал авч тэргүүллээ. 

МАН-ын Удирдах зөвлөлөөс социологийн судалгаанд үндэслэн энэ удаагийн сонгуульд нэр дэвшигчдээ тодруулсан. Ингэснээр УИХ-ын сонгуулийн 18 дугаар тойрог буюу Хэнтий аймагт социологийн судалгаагаар хамгийн өндөр рейтингтэйгээр аймгийн Засаг дарга, аймгийн МАН-ын хороон дарга Ц.Идэрбат тэргүүлж, Бага хурлын гишүүдийн 97,8 хувийн саналаар нөхөн сонгуульд нэр дэвших эрхээ авсан билээ.

Ц.Идэрбат нь Англи хэлний багш, Төрийн удирдлагын менежер мэргэжлээр их сургуулиа дүүргэсэн. Тэрбээр, 2008-2012 онд Хэнтий аймгийн Хэрлэн сумын засаг даргын орлогч, 2016-2020 Хэрлэн сумын Засаг дарга бөгөөд Чингис хотын захирагч, 2020 оноос Хэнтий аймгийн Засаг даргаар ажиллаж буй юм. 2008, 2012, 2016, 2020 онд дөрвөн удаа аймгийн ИТХ-ын төлөөлөгчөөр сонгогдож байжээ. 

Хөрөнгө орлогын тухайд

• Өөрийн орлого: 22 сая төгрөг 
• Гэр бүлийн орлого: 40 сая төгрөг 
• Орон сууц, барилга байгууламж: 266 сая төгрөгийн үнэлгээ бүхий нийтийн орон сууц 
• Тээврийн хэрэгсэл: 24 сая төгрөгийн үнэ бүхий тээврийн хэрэгсэл  
• Хадгаламж: 15 сая төгрөг 
• Зээл: 104 сая төгрөг 
• Авлага: 50 сая төгрөг
• Патент, тусгай зөвшөөрөл: 3 ширхэг

Энэ удаагийн нөхөн сонгуульд Ц.Идэрбат бол 248 сая төгрөгийн хандив цуглуулжээ. 

Хэнтий аймгийн 18 дугаар тойргоос сонгогдсон У.Хүрэлсүх Монгол Улсын Ерөнхийлөгчөөр сонгогдсноор УИХ дахь тэдний суудал эзэнгүй байгаа билээ. У.Хүрэлсүх Ерөнхий сайд байхдаа захирамж гаргаж Ц.Идэрбатыг Хэнтий аймгийн засаг даргаар томилж байсан бол ийнхүү тэрбээр УИХ-д түүнийг орлох нь.