Хотын захиргааны шинэ цогцолборын барилгын зураг төслийн эцсийн хувилбарыг  нийслэлээс байгуулсан ажлын хэсэгт танилцуулж, талууд инженерийн дэд бүтэц, цахилгаан хангамж зэрэг дараа дараагийн нарийн төлөвлөлтийн ажлаа хэлэлцжээ.

Цогцолборын ерөнхий загвар нь хүний нүд мэт хэлбэртэй байхаар төсөөлж боловсруулсан бөгөөд НЗДТГ болон Захирагчийн ажлын алба, харьяа агентлагуудыг хойд хэсгийн 20 давхар барилгат, урд хэсэгт нь НИТХ-ын төлөөлөгчид, ажлын албадын барилга байхаар зураг төслийг гаргасан байна.

Харин энэхүү 2 барилгын дунд хэсэгт нийслэлийн Иргэд хүлээн авах төв болон  иргэдэд үйлчилгээ үзүүлэх газруудыг байрлуулахаар төлөвсөн байна. Энэ нь иргэдээ нүдний цөцгий мэт хайрлан, хамгаалах, халамжлах гэсэн утга агуулгыг илэрхийлж байгаа юм байна.



БНСУ-ын “Халла” групп энэ төслийг хэрэгжүүлэх эрх авсан. СХД-ийн 6-р хороо буюу хуучнаар Ханын материалын үйлдвэрийн орчмын 9 га газарт хотын захиргааны шинэ цогцолборыг барихаар шав тавьсан билээ.

“Халла” группын архитекторын танилцуулснаар хотын захиргааны шинэ цогцолборын барилгыг 50 400 метр квадрат талбайд барихаар төлөвсөн байна.

Цогцолборыг 2015 онд ашиглалтад оруулахаар төлөвлөж байгаа юм. Ингэхдээ цахилгааны эх үүсвэрээ сэргээгдэх эрчим хүчээр шийдэхээр тооцоолж байгаа аж.



Р.Батбилэг