Амьдралын ухаан бүрэн суугаагүй ч өөрийн хүсэл эрмэлзэл, үзэл бодлоо тодорхойлж бие хүн болон төлөвшсөн үе бол хүний 17 нас байдаг. Магадгүй амьдралд хөл тавихад бэлэн болсон нас юм.

Боловсрол суваг телевизийн “17 нас” ток шоу нэвтрүүлэг манай GoGo TV буланд маань нэмэгдэж орлоо. Энэхүү нэвтрүүлэгт олны танил урлаг соёлын уран бүтээлчид оролцдог бөгөөд тэд бага насны дурсамж тэр тусмаа 17 нас, өсвөр үеийнхээ тухай сонирхолтой яриа өрнүүлдэг билээ.

Энэ удаагийн дугаарт Нисванис хамтлагийн дуучин Л.Энх-Амгалан буюу Амгаа орсон юм. Багаасаа “Битлз” хамтлагийг сонсож, хөгжим яруу найргаас салж чадахаа байсан хүү хэзээ нэгэн цагт хамтлаг байгуулж бусдыг байлдан дагуулах мөрөөдөлтэй байжээ. Тэрбээр 15 настайдаа МУБИС-ийн хөгжмийн ангид элсэн орсон бөгөөд 17 настайдаа хоёрдугаар курсын оюутан байжээ. Сургууль-дотуур байр, дотуур байр-сургууль гэсэн жимтэй байсан тэрээр замаасаа хазайвал төөрчихдөг хүүхэд байсан гэнэ.

Зургаадугаар ангиасаа эхлэн дуу зохиож эхэлсэн тэрбээр 16, 17 насандаа “Шиврээ бороо”, “Нандин хайр”, “Эрдэнэт хотын дурсамж”, Байздагийн дуулдаг “Анхны хайр” зэрэг дуунуудыг зохиожээ.


Мөн хүүхэд насанд нь сайхан дурсамж үлдээсэн анхны үерхлийнхээ тухай ярьсан юм. Нөгөө ангийн хөөрхөн охинтой захидлаар харьцаж, харахаараа ичээд гүйчихдэг хүүхэд байжээ. Амгаа “Магадгүй тэр охиноор хөглөгдөж тухайн үед зохиосон дуунууд маань төрсөн” хэмээн хуучилжээ.

Та бүхэн Амгаагийн оролцсон “17 нас” ток шоу нэвтрүүлгийг үзэхийг хүсвэл ЭНД дарна уу.

Б.Сондор