Хүүхдээ дунд сургуульд орох хүртэл нь ухаалаг гар утас авч өгөхгүй байх талаар албан ёсны анхааруулгыг засгийн газраас эцэг, эхчүүдэд өгөх ёстой хэмээн Их Британийн Cэтгэл судлаачдын коллежийн Дэд захирал доктор Жон Голдин үзэж байна.

Түүний хэлж буйгаар эцэг эхчүүд хүүхдүүд нь сургууль дээрээ гадуурхагдана хэмээн хүүхдүүддээ гар утас авч өгөхөөс аргагүйд хүрдэг аж. Засгийн газраас ухаалаг гар утсыг хүүхдэдээ хэзээ өгч болох тухай албан ёсны зөвлөмж гаргах нь эцэг эхчүүдэд маш их хэрэг болно.

Хүүхдүүд ээж аавдаа “Миний бүх найзууд ухаалаг утастай, яагаад надад утас авч өгдөггүй юм бэ?” гэж гомдоллодог. Яг ийм үед эцэг эхчүүдэд засгийн газраас гаргасан зөвлөмж л хэрэг болно. 11-ээс доош насны хүүхдийнхээ  ухаалаг гар утасны хэрэглээг өдөрт хамгийн дээд тал нь 2 цаг байхаар хязгаарлах ёстой"  гэсэн зөвлөмжийг эцэг эхчүүдэд өгөх ёстой хэмээн Доктор Жон Голдин ярьжээ. 

Түүний хэлж байгаагаар нийгмийн сүлжээ нь хүүхдийн сэтгэлийг түгшээж, сэтгэл гутралд оруулахаас гадна цахим орчин дахь дарамтанд өртөх эрсдлийг нэмэгдүүлдэг. Хүүхдүүд ихэнхдээ 13 нас хүрэхээсээ өмнө нийгмийн сүлжээнд бүртгүүлдэг болохыг ч онцолжээ.
Цахим орчинд цагийг өнгөрүүлэх нь хүүхдүүдэд ямар хор нөлөө үзүүлдэг талаар Их Британийн Сэтгэл судлаачдын  коллежоос гаргасан судалгаанд 8-11 настай 10  хүүхдийн 4 нь ухаалаг гар утас барьдаг болохыг тогтоожээ.

Харин энэхүү судалгаанд оролцсон эцэг эхчүүдийн 40 гаруй хувь нь 16-гаас доош насны хүүхдүүдэд ухаалаг гар утас эзэмшихийг хориглох ёстой гэсэн саналтай буй аж. Түүнчлэн эцэг эхчүүдийн 67 хувь нь хүүхдэд хэзээ ухаалаг гар утас өгч болохыг засгийн газраас шийддэг болоосой гэж хүсч буйгаа илэрхийлжээ.

Судалгаанд оролцсон 1000 эцэг эхчүүдийн 92 хувь нь интернет хүүхдүүдэд нь муугаар нөлөөлж байна гэжээ. Ухаалаг гар утасны донтолт хүүхдийнх нь нойронд нөлөөлж, өөртөө итгэх итгэлийг нь бууруулсан гэнэ.