2025 онд үл хөдлөх хөрөнгийн дэлхийн зах зээл дахин хямралд өртөнө.

Харин энэ удаагийн хямрал нэлээд хүнд байх бөгөөд дэлхийн санхүүгийн системийг бүхэлд нь ганхуулж болзошгүй талаар Английн үл хөдлөх хөрөнгийн холбооны гүйцэтгэх захирал Пол Бато мэдэгджээ.

Тэрээр Латвийн нийслэл Рига хотноо болж буй олон улсын үл хөдлөх хөрөнгийн зах зээлийн холбооны хурал дээр үг хэлсэн байна. “Хямрал гарах тутам улам бүр хүнд тусдаг. Тиймээс 2025 онд бүр хүндрэх учир түүнээс урьдчилан сэргийлэх шаардлагатай. Өмнөх алдаан дээрээ сурах шаардлагатай” гэж тэрээр онцолсон аж.

2008 оны хямралаас гарч байгаа шинж тэмдэг дөнгөж энэ оны нэгдүгээр улирлаас анзаарагдаж эхэлсэн. Харин одооноос эхлээд шинэ хөгжил ирж байна. Ийм нөхцөлд өмнөх алдаагаа яагаад ч давтаж болохгүй хэмээн П.Бато үзэж байгаа юм.  

Үл хөдлөх хөрөнгийн салбарт банкууд хэтэрхий их зээл олгосон нь өмнөх жилийн гол алдаа байсан. Банкууд богино хугацаанд их хэмжээний орлого олох гэж эрмэлзэж ирсэн. Хөрөнгө оруулагчид ч гал дээр тос нэмсэн гэж тэрээр ярилаа.

АНУ-д ипотекийн хямралаас үүдэн 2008 онд дэлхийг хамарсан эдийн засгийн хямрал нүүрлэсэн билээ. Энэ хямрал 2006 оноос эхтэй төдийгүй үл хөдлөх хөрөнгийн зах зээлд ноцтой нөлөөлж эхэлсэн байдаг. Үүнээс болж барилгын үнэ унаж, барилгын зах зээл бүхэлдээ хямралд автсан юм.  

Т.Бүрэн