"Маш нууц-2" буюу "Байтаг богд" киноны нээлтээ өчигдөр хийсэн "Фантастик" продакшны найруулагч  Б.Тамир Монгол Улсын Үндэсний аюулгүй байдлын зөвлөлийн "Хүндэт тэмдэг"-ээр шагнууллаа.

Шагналыг Үндэсний аюулгүй байдлын зөвлөлийн  Ажлын албаны дарга Д.Даваа-Очир “Мартагдсан, орхигдсон, нууцлагдсан түүхт сэдвээр маш нууцын зэрэглэлээс гаргаад онцгой сайн кино хийсэн та бүхэнд талархаж байгаагаа илэрхийлье. Энэ шагналыг Зөвлөлийн нөхөд маань ярилцаад кино найруулагч Б.Тамиртаа гардуулахаар шийдсэн” хэмээн  хүндэт тэмдгээ гардуулсан юм.

Шагналаа гардан авахдаа Б.Тамир “Энэ ганцхан миний шагнал биш. Ард зогсож байгаа шижигнэсэн олон сайхан залуучуудын шагнал шүү. Та нар байхгүй бол би байхгүй. Бүгдээрээ хамтдаа МОНГОЛ УЛСЫН ТӨЛӨӨ ЗҮТГЭЕ!” хэмээн уран бүтээлчидтэйгээ дуу нэгтэйгээр  хэлээд ёсоллоо.

Түүнчлэн соёл урлагийн салбарт оруулсан хувь нэмрийг нь үнэлж, 120 гаруй киноны дууны найруулагчаар ажилласан О.Цэгмэдийг БСШУС-ын сайд Ц.Цогзолмаагийн тушаалаар Соёлын тэргүүний ажилтан цол тэмдгээр шагналаа.

Мөн энэ үдэш “Маш нууц 2” “Байтаг богд” киноны Тэгшээгийн дүрд тоглосон, “Фантастик” продакшны жүжигчин Э.Одбаяр,  тус киноны зураглаачаар ажилласан Г.Гүенбаатар нарыг соёл урлагийн салбарт оруулсан хувь нэмрийг нь үнэлж, БСШУС-ын нэрэмжит Жуух бичгээр шагналаа.

Гэрэл зургийг  Б.Батбилэг