Шинэ залуу хамтлаг, дуучид дундаас хамгийн идэвхитэй, хамгийн хүчтэй бас тэр хэмжээгээрээ эрэлттэй байгаа нь яах аргагүй монголын рок попын нэгэн их айл “UP MUSIC” продакшнаар овоглодог “Anemone” хамтлаг билээ.



Тэд өнгөрсөн 6 дугаар сард анхны бие даасан цомгоо сонсогч фенүүддээ танилцуулж, худалдаанд гаргасан юм. Энэ цомгийн дуунууд нь залуусын сонсох дуртай дуунууд төдийгүй хит чартуудад дээгүүрт жагссаар байгаа. Мөн цомгийн ихэнх дуунууддаа клип бүтээлгэж, олон шинэ сонирхолтой клипээр фенүүддээ бэлэг барьсаар байна.

Харин хамтлагийн зүгээс энэ удаад задлах ээлжит сюрприз нь “Чингис хаан” хамтлагийн даралтат хөгжимчин Ц.Байдрагийн үг, аялгуугаар бүтсэн “Чамдаа би дуулъя” хэмээх гэгээн хайрын сэдэвт, хөнгөн поп хэмнэлтэй дуу юм.





Уг дууны клипийг хэдийгээр шинэ ч гэлээ байгуулагдсан цагаасаа хойш шинэлэг хийц, өвөрмөц өнгө төрх бүхий клипүүдээрээ үзэгчдийн талархлыг хүлээж байгаа “ILAB” студийн авьяаслаг залуу уран бүтээлчид хийсэн байна.
 
Мөн дууны хөгжмийн найруулгыг нь дууг зохиогч Ц.Байдраг орчин үеийн хөгжмийн дуугаралт, хэмнэлээр хийсэн бол хөгжмийн тохируулгын ажлыг нь “N11” студийн Н.Наранбаатар, мастерингийг нь Сингапур улсын “MYX” студийн Жерри Чуа хэмээх гадны уран бүтээлч хийж гүйцэтгэжээ.

“Чамдаа би дуулъя” дуу нь аль хэдийнэ залуусын дунд хит болж амжжээ. Одоо мөн клип нь ч олон үзэгчийн хандалт авсаар байгаа юм. Ингээд “Anemone” хамтлаг уран бүтээлийн сангаа бас нэгэн сайхан хайрын дуугаар зузаатгалаа. Авьяаслаг, хөдөлмөрч хамтлагийнхны энэ удаагийн бүтээл үзэгч танд өөр содон, шинэ мэдрэмж төрүүлнэ гэдэгт итгэлтэй байна.

Хайр дурлалын шивнээ, сонирхолтой түүх өгүүлэн уянгалах охидын шинэ уран бүтээлийг та бүхэн ЭНД дарж таалан болгооно уу.