Үндэсний хувцасны гайхамшигт өв соёлыг дэлхий нийтэд сурталчлан таниулах, үндэсний өв соёлоороо бахархах үзлийг түгээн дэлгэрүүлэх зорилго бүхий “Дээлтэй Монгол” наадам амжилттай үргэлжилж байна.

Жил бүрийн долдугаар сарын 13-нд зохион байгуулагддаг уг наадам энэ жилийн хувьд цаг агаарын байдалтай холбоотойгоор хойшлон ийнхүү өнөөдөр болж буй юм.

Долоо дахь удаагаа зохиогдож буй уг наадамд өлгийтэй балчираас өтгөс буурлууд оролцож байгаагийн дээр энэ жил хамгийн олон хүн үндэсний хувцастайгаа цугларсан гэсэн төрлөөр Гиннест бүртгүүлэхээр төлөвлөсөнөөрөө онцлог юм.



Наадмын үеэр нийслэлийн дүүргүүдийн төлөөлөл, загварын болон урлаг соёлын байгууллагууд, хүүхэд багачууд оролцож буй бөгөөд энэ үеэр ардын урлагийн тоглолт, үндэсний хувцасны загварын үзүүлбэр, Монгол гэрийн үзэсгэлэн, үндэстэн ястны болон нийтийн цэнгээнт бүжгийн тэмцээнүүдээс гадна “Дээлтэй Монгол” наадмын үйл ажиллагааны үндсэн хэсэг болох Монгол үндэсний хувцастай баярын жагсаал болж буй юм.





Монгол дээлээрээ бахархах, Үндэсний хувцсаараа гоёсон иргэд, байгууллагуудыг хэд хэдэн номинацаар шалгаруулж шагнал гардуулах юм. Тухайлбал, Үндэсний дээлтэй хамгийн бяцхан оролцогч, Монгол үндэсний дээлтэй гадаадын зочдын шилдэг хос, Хамгийн сайхан дээлтэй хос, Хамт олноороо идэвхтэй оролцсон байгууллага зэргийг шалгаруулах аж.



Яг одоо Их эзэн Чингис хааны талбайд болж буй наадмын гэрэл зургийг Та ЭНД дарж сонирхоно уу.

А.Сүрэн