МҮОНТ-ээр “Оргил өөд” нэвтрүүлэг цацагдаж эхлээд байна. Тус нэвтрүүлгийн анхны зочноор Ерөнхий сайд Н.Алтанхуяг оролцож өөрийн хувийн амьдрал болоод Засгийн газрын хүрээнд хийж буй ажлуудынхаа талаар ярьсан юм.

Ерөнхий сайд Н.Алтанхуягийг “Алтантуяа” хэмээн хочлох тохиолдол бий. Энэ талаар сэтгүүлч асуухад Ерөнхий сайд “Би их сургуулиа төгстлөө Н.Алтантуяа нэртэй байсан. Энэ нэрнээсээ огт санаа зовдоггүй байсан ч 20 гарсан хойноо нэрээ сольж Н.Алтанхуяг болгосон” гэсэн юм.

Түүнд энэ нэрийг эх барьж авсан хөрш хөгшин нь өгсөн байж.

Ерөнхий сайд эмэгтэй нэрнээсээ болж их сургуулийнхаа эмэгтэйчүүдийн баяраар бэлэг авах хүний тоонд хүртэл орж байжээ.

Мөн түүнийг анхны эхнэрээсээ салах болсон шалтгааныг сэтгүүлч асуухад “би шударга л хариулсан нь дээр байх. Би л даварсан асуудал болсон юм” гэж хариулсан.

Н.Алтанхуяг Ерөнхий сайд анхны эхнэрээсээ хоёр охин, нэг хүүтэй юм. Харин хоёр дахь эхнэр нь түүнд дөрвөн охин төрүүлж өгсөн бөгөөд хамгийн бага  нь одоо долоон сартай юм.

Ч.Тэлмэн