Архангай аймаг буюу Хангайн нурууны Гурван ангархай, Цохиотын нуруунаас эх аван урсдаг Урд Тамирын голын урсац зарим газарт ширгэж, тасалдсан талаар орон нутгийн иргэд мэдээллээ.

Өдгөө Цэцэрлэг сумын урд хэсгээр гол урсахгүй байгаа бөгөөд хаа нэг хонхор хэсэгт цүнхээл тогтож үлдсэн, түүнд загаснууд нь бөөгнөрч амь тэмцсэн байдалтай байгаа аж. /Фото эх сурвалж: flickr.com/

Нийт 13 100 ам метр талбайгаас усаа цуглуулж, 280 км зайд 2 м/с-ийн хурдацтай урсдаг байсан Урд Тамир гол урьд өмнө ямар ч ган гачгийн үед ширгэж, тасалдаж байгаагүй тухай нутгийн иргэн Д.Сэрээтэр ярилаа.

Одоогийн байдлаар гол чухам ямар шалтгааны улмаас ширгэсэн хийгээд голын эх, голдиролд уул уурхайн болон бусад чиглэлийн үйлдвэрлэл явуулсан эсэх, хүний үйл ажиллагааны нөлөө, байгаль цаг уурын өөрчлөлт гэх мэтийн аль нь болохыг тогтоогоогүй байна.

Д.Үлэмж