ЗХУ-ын анхны бөгөөд сүүлчийн Ерөнхийлөгч Михаил Горбачёв өчигдөр 90 нас хүрчээ. Тэрбээр 1931 оны гуравдугаар сарын 2-ны өдөр Ставропольскийн хязгаарын Привольное тосгонд төрсөн байна. 

Горбачёв 1990 оны гуравдугаар сарын 15-ны өдөр ЗХУ-ын Ерөнхийлөгчөөр сонгогджээ. Тэрбээр олон ургалч үзлийг хөгжүүлэх бодлого явуулсны үр дүнд 1990 онд Орост Хэвлэл мэдээллийн салбарт төрийн зүгээс хязгаарлалт тогтоохыг хориглосон хууль батлагджээ. Түүнчлэн Горбачев Социалист нийгмийн үед улс төрийн шалтганаар хэлмэгдсэн хүмүүсийг цагаатгах нүсэр ажлыг эхлүүлсэн байна.

"Перестройка" буюу "Өөрчлөн байгуулалт"-ын эцэг гэгддэг түүний бодлогууд одоог хүртэл маргааны сэдэв болсоор байна. Дэмжигчид нь болон түүнтэй хамт ажиллаж байсан хүмүүс Горбачёвыг шүүмжлэлд хариу өгч сурсан туйлын болгоомжтой хүн гэж дурсдаг байна. 

1991 оны арванхоёрдугаар сарын 25-нд Горбачёв ЗХУ-ын анхны Ерөнхийлөгчийн албан тушаалаас огцрох шийдвэр гаргаснаа ард түмэндээ телевизээр зарлаж Оросын Ерөнхийлөгч Борис Ельцинд бүх эрх мэдлээ шилжүүлэн, ЗХУ-ын Төрийн далбааг Кремлиэс буулгаж ОХУ-ын далбааг мандуулжээ.

Эх сурвалж: Википедиа, Gazeta.ru