Боловсролыг дэмжигч М-Си-Эс Группын “Оюутны тэтгэлэгт хөтөлбөр”-ийн 2013-2014 оны хичээлийн жилийн сонгон шалгаруулалт эхэллээ. Оюутан залуусын хүсэн хүлээдэг энэхүү хөтөлбөрөөр жил бүр 30 оюутан мөнгөн тэтгэлэг хүртдэг бөгөөд М-Си-Эс Группын харьяа компаниудад дадлага хийх, улмаар их, дээд сургуулиа төгсөөд ажлын байрны урилга гардах боломжтой болдог юм. Мөн чадвартай мэргэжилтэн, бүтээлч хувь хүн байхад чиглүүлэх М-Си-Эс Академийн сургалтанд хамрагдах, группын компаниудтай танилцах өдөрлөг, чөлөөт цагаа үр бүтээлтэй өнгөрүүлэх, багийн хамтын ажиллагааны чадварыг бий болгох зорилготой явган аялал зэрэг олон хөтөлбөрт хичээлийн нэг жилийн турш хамрагддаг уламжлалтай.



Дотоодын их, дээд сургуульд 3.0-оос дээш голч дүнтэй суралцаж буй төгсөх болон төгсөхийн өмнөх курсын аль ч мэргэжлийн чиглэлээр суралцаж буй бүх оюутанд нээлттэй уг хөтөлбөр 2013-2014 оны хичээлийн жилд сар бүр 100 000 төгрөгийн тэтгэлэг олгоно. Энэ сарын 29-ний өдрийг дуустал үргэлжлэх “Оюутны тэтгэлэгт хөтөлбөр”-ийн сонгон шалгаруулалт нь тест, бүлгээр ажиллах дасгал, ярилцлага гэсэн гурван үе шаттай явагдах бөгөөд хамрагдахыг хүссэн оролцогч scholarship.mcs.mn хаягаар онлайн анкетаа 3 дугаар сарын 10-ны дотор бөглөж бүртгүүлнэ.

Нийгмийн хариуцлагатай М-Си-Эс Групп энэ жил арав дахь удаагаа “Оюутны тэтгэлэгт хөтөлбөр”-ийг зохион байгуулж байгаа бөгөөд өнгөрсөн хугацаанд нийт 260 гаруй оюутанд мөнгөн тэтгэлэг олгосноос гадна тэдний чадвар, мэргэжлээ улам бүр сайжруулах хүсэл тэмүүллийг дэмжсээр ирсэн билээ. Өдгөө олон шилдэг оюутан группын компаниудад чадварлаг мэргэжилтэн болон ажиллаж байна.