Нээлтэй эхийн программ хангамж руу хэрхэн зардал багатай, хурдан шилжих боломж байгаа талаар мэргэжилтнүүдээс зөвлөгөө авахаар “Нээлттэй  эхийн программ хангамжийг нэвтрүүлэх, хөгжүүлэх боломж” сэдэвт хэлэлцүүлгийг  УИХ-ын даргын ивээл дор Төрийн ордонд зохион байгууллаа.

Өнгөрсөн оны 12 сард нээлттэй эхийн программын төсөл дээр ажилладаг хүмүүсийн чадварын Монгол Улсын стандарт батлагдсан бөгөөд УИХ-ын тамгын газрын 450 хэрэглэгч энэ чадварыг эзэмшсэн байх ажлын байрын тодорхойлолт гаргаж байгаа юм. Мөн цаашдаа төрийн албан хаагчдыг ийм чадвартай байхыг шаардах юм байна.
Мөн 2013 онд багтан УИХ-ын Тамгын газрын 450 хэрэглэгчид нээлттэй эхийн программ хангамж ашигладаг болох асуудлыг бүрэн шийдэх юм.

УИХ-ын дарга З.Энхболд дээрх хэлэлцүүлгийн үеэр хэлэхдээ, Төрийн программ хангамжийн хэрэглээнд Microsoft-ийн үнийг төлөх үгүй бол нээлттэй эхийн программ хангамжид шилжихийн аль нэгийг сонгох цаг иржээ. Зах зээлийн системд шилжээд  22 жил өнгөрлөө. Одоо дэлхий нийтйин чиг хандлагатай хамт явахгүй бол алийн болгон  болгон хулгайн юм хэрэглэх вэ?.  Хулгайн юм хэрэглээд байвал үндэсний программ ханхамжийн салбар хөгжихгүй, программистууд ажил, орлоготой болж чадахгүй. Дээр нь мэдээллийн аюулгүй байдал ч маш их хурцдаж байна. Хамгийн их халдлагад өртдөг нь Microsoft өөрөө байдаг бол нээлттэй эх харьцангүй гайгүй байдаг. Ийм шалтгаанаар УИХ тамгын газрын нээлттэй эхийн программ хангамж руу шилжихэд бэлтгэж эхэлсэн гэлээ.

2013 онд БНСУ-ын Засгийн газрын 3,5 сая ам.долларын буцалтгүй тусламжаар,БНСУ-ын олон улсын хамтын ажиллагааны байгууллага /КОИКА/-тай хамтран хэрэгжүүлэх “Цахим парламент” багц төслийн хүрээнд байгуулагдах “Парламентын цахим мэдээллийн төв”-ийг түшиглэн нээлттэй эхийн програм хангамжийг хөгжүүлэх эх суурийг тавих боломжтой аж.

Энэ сарын 16-ны өдөр УИХ-ын дарга З.Энхболд оюуны өмчийн зөрчилгүй программ хангамжийн бүтээгдэхүүн хэрэглэхийг төрийн байгуулагуудад уриалсан юм. Энэ уриалгын хүрээнд УИХ, түүний тамгын газрын байгууллагуудаас анх санаачилга  гарган нээлттэй эхийн программ хангамж нэвтрүүлэхээр шийдвэрлэж, дээрх хэлэцүүлгийг хийж байгаа ажээ.

Тус хэлэлцүүлэгт Монголын залуу программистуудын холбоо, Линукс хэрэглэгчдийн бүлгэм төрийн бус байгууллагууд болон “Юу-Эс-Ай” ХХК оролцож байна. Оролцогчид “УИХ, түүний тамгын газрын мэдээллийн технологийн өнөөгийн байдал, бодлого”,”Нээлттэй эхийн программ хангамж нэвтрүүлсэн бусад орны туршлага”, “Нээлттэй эхийн стандарт” “Мэдээллийн аюулгүй байдлыг хангах” зэрэг сэдвээр илтгэл тавьж хэлэлцүүллээ.

Хэлэлцүүлгийн төгсгөлд УИХ-ын Тамгын газар болон төрийн байгууллагуудад нээлттэй эхийн программ хангамж нэвтрүүлэх, хөгжүүлэх талаар зөвлөмж гаргалаа.

Б.Нар