Энэ сарын 9-нд УДЭТ-т шүлэг шимтэн сонсох дуртай, зохиолч яруу найрагчдын хүсэн хүлээдэг хамгийн том наадам болох “Болор цом-30” яруу найргийн наадам болно. Яруу найргийн наадмыг хэрхэн зохион байгуулах гэж байгаа, энэ жилийн онцлог, хэчнээн яруу найрагч шүлгэн хүлгээ уралдуулах гэж байгаа талаар Монголын зохиолчдын хорооны нарийн бичгийн дарга Н.Минжинсайхантай утсаар тодруулга авсан юм. “Болор цом-30” яруу найргийн наадмыг энэ жил өмнөх жилүүдээс нэлээн өргөн хүрээнд тэмдэглэхээр зохион байгуулагчид тун завгүй гадуур ажилтай явцгаасан байлаа.

-Сайн байна уу. “Болор цом-30” яруу найргийн наадамд энэ жил хэчнээн яруу найрагч бүртгүүлээд байгаа вэ?
-Оны шилдэг шүлэг шалгаруулах “Болор цом-30” яруу найргийн наадамд энэ жил 200 гаруй найрагч бүртгүүлээд байна. Анх 1983 оноос эхэлж зохиогдсон “Болор цом” наадмын 30 жилийн ой энэ жил тохиож байгаа билээ. Тиймээс бүртгүүлсэн 200 гаруй найрагчдаас 34 яруу найрагч шалгарч шүлгээ уншина.

-Энэ жилийн шүүгчдээр ямар хүмүүс ажиллах вэ?
-Шүүгчдийн нэрийг нууцалж байгаа. Учир нь наадмаас өмнө шүүгчдийн нэрийг зарлачихвал янз бүрийн сөрөг үр дагавар гарах магадлал өндөр байдаг. Тиймээс шүүгчдийн нэрийг зарлахгүй байхаар шийдвэрлэсэн.

-Өнгөрсөн жил яруу найрагч, “Болор цом”-ын эзэн Ц.Бавуудорж төрийн соёрхол хүртлээ. Ер нь үе үеийн “Болор цом”-ын эзэд наадамд ирж мялаалгын шүлгээ хайрлах уу?
-Тийм ээ. Өнгөрсөн жил манай зохиолч яруу найрагчдын хувьд сайхан жил байлаа. Ц.Бавуудорж маань төрийн соёрхол хүртлээ. Энэ нь Монголын зохиолчдын хорооны бүх яруу найрагч хийгээд утга зохиолыг мэддэг, мэдэрдэг бүх хүн баярласан сайхан үйл явдал болсон юм. Үе үеийн “Болор цом”-ын эзэд маань өөрсдөө наадамд оролцож байгаа. Мөн мялаалгын шүлгээ ч өргөн барих болно.

-Сүүлийн үед “Болор цом” наадмыг хөдөө орон нутагт зохион байгуулж байгаа. Харин энэ жил Улаанбаатар хотод зохион байгуулах гэж байгаа юм байна?
-Тийм ээ өнгөрсөн хоёр жил хөдөө орон нутагт зохион байгуулсан. Энэ жил 30 жилийн ой тохиож байгаа учраас Улаанбаатар хотод зохион байгуулахаар болсон.

“БОЛОР ЦОМ -30” ЯРУУ НАЙРГИЙН НААДМЫН ЭХНИЙ ШАТАНД ШАЛГАРСАН НАЙРАГЧИД

1. Ш.Анхтуяа
2. Ц.Авирмэд
3. Н.Батжаргал
4. Б.Батсайхан
5. М.Билэгсайхан
6. Б.Бүргэд
7. П.Бөхбат
8. Л.Ганзул
9. Б.Ганхүрэл
10. Н.Гантулга
11. Э.Гантулга
12. С.Дамдиндорж
13. З.Дорж
14. Х.Дугарсүрэн
15. Б.Жавзандулам
16. Т.Зөнбилиг
17. Ю.Идэрчулуун
18. Б.Мягмаржав
19. С.Начин
20. Д.Одгэрэл
21. Б.Ойдов
22. Ч.Очирбат
23 Б.Оролзод
24. М.Отгонбаяр
25. Б.Сарантуяа
26. Э.Сударчулуун
27. Л.Торой
28. Ай.Төмөр-Очир
29. С.Ууганбаяр
30. M.Уянсүх
31. О.Цэнд-Аюуш
32. Б.Чулуунцэцэг
33. Х.Эрдэв
34. Цэцэнцогт-Өвөр Монголоос

Г.Хишигт