Америкийн Вашингтон хотын Исак Нолтин гэх 12 настай хүү долоодугаар сард хөрш айлын 13 настай хүү Дакота Зиммэртэй танилцжээ.

Тэр цагаас хойш тэд сайн найзууд болсон бөгөөд анх уулзсан цагаасаа хоорондоо ижил төстэй зүйлс байгааг анзаарсан байна. Жишээ нь тэдний төрх байдал ялангуяа хамар, ам, гар нь адилхан бөгөөд хүмүүс тэднээс үеэлүүд үү эсвэл ах дүү юу хэмээн байнга асуудаг байсан гэнэ. Тэр ч байтугай төрсөн өдөр нь хүртэл нэг өдөр байсанд тэд ихэд гайхжээ.

Нэгэн өдөр Дакота эрэгтэй дүүтэй байсан хэдий ч түүнийг Даун гэх нэгэн эмэгтэйд өргүүлсэн гэж Исакт хэлсэн байна. Исак харин тэр даруй гэртээ харьж өөрийн ээж Даун Нолтингоос өөрийгөө өргөмөл хүү эсэхийг асуухад түүнийг өсгөх хугацаандаа энэ талаар нэг ч үг цухуйлгаж үзээгүй Даун ихэд цочирдсон гэнэ.

Тэдний төрсөн ээж нь өсвөр насандаа хоёр ч хүүхдийн эх болсон хэдий ч тэднийг хангалттай сайн асарч чадахгүй байсанд Даун өөрийн хүсэлтээрээ ирж тэдний хүүхдийг ялангуяа нялх Исакыг хардаг байжээ. Гэтэл Исакыг ой 6 сартай байхад нь Даун түүнийг өргөж авах саналыг төрсөн ээжид нь тавьсан бөгөөд Исакыг хүнд өргүүлэх нь хоёр ч хүүхэдтэй өсвөр насны эхэд цагаа олсон явдал болсон юм.

Харин Даун ах дүү хоёрыг хэзээ нэгэн цагт учрах байх хэмээн боддог байсан нь биеллээ олжээ.

Харамсалтай нь тэдний төрсөн ээж 2007 онд өөд болж жил гаруйн дараа аав нь ч мөн нас барсан байжээ. Түүнээс хойш Дакота эмээ дээрээ дүү охин Эшлигийн хамт амьдарсаар иржээ. Тэд энэ намар төрсөн өдрөө цуг тэмдэглэсэн бөгөөд хоёулаа Xbox тоглож, дугуй унаж, скэйтээр хичээллэх дуртай гэнэ.