Үндэсний статистикийн хорооноос гаргасан 2012 оны аравдугаар сарын байдлаарх нийгэм эдийн засгийн зарим тоон үзүүлэлтийг хүргэж байна.

ЭДИЙН ЗАСАГ
Бараа бүтээгдэхүүний үнэ аравдугаар сард өмнөх сарынхаас 0.6 хувь, оны эхнээс 12.9 хувь,  өмнөх оны мөн үеийнхээс 15.0 хувиар өссөн үзүүлэлт гарчээ.     
    
Ийнхүү үнэ өмнөх сарынхаас өсөхөд орон сууц, ус, цахилгаан, түлшний  бүлгийн  үнэ дүнгээрээ 4.6 хувиар өссөн нь голлон нөлөөлжээ.

Аж ахуйн нэгж, байгууллага, иргэдэд олгосон нийт зээлийн өрийн үлдэгдэл 2012 оны аравдугаар  сарын эцэст 6855.4 тэрбум төг болж, өмнөх сарынхаас 0.2 хувиар буурч, өмнөх оны мөн үеийнхээс 31.3 хувиар өсчээ.
Хугацаа хэтэрсэн зээлийн өрийн үлдэгдэл 132.5 тэрбум төгрөг болж,  өмнөх сарынхаас 13.2 хувь, өмнөх оны мөн үеийнхээс 86.6 хувиар өсчээ.     

Банкны системийн хэмжээгээр чанаргүй зээл 306.2 тэрбум төгрөг болж, өмнөх сарынхаас 0.03 хувь, өмнөх оны мөн үеийнхээс 11.9 хувиар буурсан байна.

Монгол Улс 2012 оны эхний 10 сард дэлхийн 135 оронтой  худалдаа хийж, гадаад худалдааны нийт бараа эргэлт 9404.0 сая ам.доллар, үүнээс экспорт 3664.7 сая ам.доллар, импорт 5739.3 сая ам.долларт хүрчээ. Экспортын 98.2 хувийг эрдэс бүтээгдэхүүн, үнэт ба хагас үнэт чулуу, үнэт металл, гоёлын зүйлс, зоос,  түүхий болон боловсруулсан арьс, шир, ангийн үс, тэдгээрээр хийсэн эдлэл, нэхмэл бүтээгдэхүүн эзэлж байна.       

НИЙГЭМ
Бүртгэлтэй ажилгүй иргэдийн тоо 2012 оны 10 дугаар сарын эцэст 40.1 мянга болж, өмнөх оны мөн үеийнхээс 745 хүнээр буюу 1.9 хувиар өсчээ.

Нийгмийн даатгалд энэ оны эхний 10 сард 687 мянган хүн шимтгэл төлөгч, даатгуулагчаар бүртгэгдсэний 67.6 хувь нь аж ахуйн нэгж  байгууллагынх, 32.4 хувь нь төсөвт байгууллагынх байна. 

Нийгмийн халамжийн тэтгэвэрт 10 сарын хугацаанд 60.6 мянган хүн хамрагдсан нь өмнөх оны мөн үеийнхээс 6.6 хувиар нэмэгджээ.

М.Жаргал