Ардчилсан намын бүлгийн өнөөдрийн хуралдаанаар их эзэн Чингис хааны мэндэлсэн өдрийг тэмдэглэх тухай хэлэлцлээ.

Их эзэн Чингис хаан 1161 оны өвлийн тэргүүн сарын шинийн нэгэнд мэндэлсэн учир түүний төрсөн өдрийг энэ өдөр хийж байхаар тус бүлгийн хуралдаанаар шийджээ. Өөрөөр хэлбэл жил бүрийн 11 дүгээр сарын 14-нд Чингис хааны төрсөн өдрийг тэмдэглэнэ гэж ойлгож болохгүй юм. Харин жил бүрийн өвлийн тэргүүн сарын шинийн 1-нд хэдэн таарна тэр өдрийг “Их эзэн Чингис хааны мэндэлсэн өдөр” болгон тэмдэглэж байхаар тогтжээ.

Мөн өнөөдөр АН-ын бүлгийн хуралдаанаар УИХ-ын дэгийн тухай хуульд нэмэлт өөрчлөлт оруулах тухай хуулийн төслийг хэлэлцсэн байна. Улмаар Төрийн байгуулалтын байнгын хороогоор хэлэлцүүлж, ирэх пүрэв гарагт болох УИХ-ын чуулганы хуралдаанаар хэлэлцэхээр болжээ. Харин МАН-ын гишүүдээр байнгын хороодын гишүүдийн тоог нэмэх саналд зарчмын зөрүүтэй хандаж, бусад намуудын байр суурийг лавлахаар болсон байна.

Өөрөөр хэлбэл МАН-ын гишүүдийг байнгын хороодод хуваан томилох тухай санал орж ирсэн нь АН-ын бүлгийн гишүүдийн эсэргүүцэлтэй тулгараад байгаа аж.

Бүлгийн дараагийн хэлэлцсэн асуудал нь УИХ-ын чуулганы хуралдаанаар унагасан Засаг захиргааны тухай хуулийн төсөл байсан бөгөөд цаашид хэлэлцэх боломжийг хангахын тулд юун дээр анхаарахаа нягтлах болсон байна. АН-ын бүлгийн гишүүд МАН-ынхан шууд ардчилалд дургүй байгаагаа илэрхийлж уг хуулийн төслийг унагасан гэж үзэж буйгаа хэлж байв.

Мөн өнөөдөр МҮАН-МАХН-ын Шударга ёс эвсэлийн бүлэг хуралдсан ч дотоод асуудлаа хэлэлцсэн учир мэдээлэл хийхгүй гэлээ. Тус бүлгийн хуралдаанаар Эрчим хүчний сайд М.Сономпилийн мэдээллийг сонссон байна.

Г.Билгүүн,  Гэрэл зургийг Б.Бямба-Очир