С.Баяр 1956 онд Улаанбаатар хотод төрсөн.

1973 онд 10 жилийн дунд сургууль, 1978 онд Москвагийн Улсын Их Сургуулийг хуульч мэргэжлээр төгссөн.

1978-1979 онд Улаанбаатар хотын АДХГЗ-нд мэргэжилтэн, Улаанбаатар хотын Найрамдлын районы гүйцэтгэх захиргаанд зааварлагч, 1979-1983 онд БНМАУ-ын Зэвсэгт хүчний Жанжин штабын IY газарт офицер, 1983-1988 онд МОНЦАМЭ агентлагийн “Новости Монголии” сонинд сурвалжлагч, редактор, “Монгол пресс” агентлагт ахлах редактор, Ерөнхий редакторын үүрэг гүйцэтгэгч, 1988-1990 онд МРТУХ-ны орлогч даргаар ажиллаж байв.

1990-1992 онд БНМАУ-ын АИХ-ын 12 дахь удаагийн сонгуулиар АИХ-ын депутат, мөн хурлын Анхдугаар хуралдаанаар БНМАУ-ын Бага Хурлын гишүүнээр сонгогдож, Улсын Бага Хурлын Төрийн байгуулалтын байнгын хорооны даргаар ажилласан.

1992-1997 онд БХЯ-ны дэргэдэх Стратеги судалгааны хүрээлэнд захирал, 1997-2001 онд Монгол Улсын Ерөнхийлөгчийн Тамгын газрын дарга, 2001-2005 онд Монгол Улсаас ОХУ-д суугаа Онц бөгөөд Бүрэн эрхт Элчин сайд, 2005-2007 оны 10 сар хүртэл МАХН-ын Ерөнхий нарийн бичгийн дарга, 2007 оны 10 дугаар сараас МАХН-ын даргаар сонгогдон ажиллаж байна.

УИХ-ын 2007 оны арваннэгдүгээр сарын 22-ны өдрийн нэгдсэн чуулганы хуралдаанаар хуралдаанд оролцсон нийт гишүүдийн (68 хүн оролцсон) 97.1 хувийн саналаар Монгол Улсын Ерөнхий сайдаар томилогдов.

Тэрбээр Монгол Улсын Засгийн газрын 25 дахь Тэргүүн юм.