"Miss International" тэмцээн нь 62 жилийн түүхтэй. Дэлхийн 80-90 орны бүсгүйчүүд оролцдог томоохон тэмцээн юм.

Манай улс энэхүү тэмцээнд 2004 оноос эхлэн ес дэх жилдээ оролцож байна. Харин "Miss Mongolia 2012" тэмцээнийг олон улсын жишгээр зургаан төрлөөр шалгаруулсан бөгөөд финалын тэмцээний үеэр өргөмжлөлөө гардан авах юм байна. Үүнд:

1. Мисс модель
2. Мисс фото
3. Мисс авьяас
4. Мисс бикини
5. Мисс спорт
6. Мисс Гүүдвил /оюунлаг, ухаалаг, тусч/

Сонирхуулахад "Мисс Монголиа 2004" тэмцээний тэргүүн мисс Ч.Содтуяа нь "Мисс Интернэшнл 2004" тэмцээнд эх орноо төлөөлөн оролцож шилдэг аравт шалгаран "Miss Photogenic" өргөмжлөл хүртсэн бол "Мисс Монголиа 2005" тэмцээний тэргүүн мисс Б.Гантогоо нь "Miss Tourism World 2006" тэмцээнээс III байрын шагнал болон шилдэг үндэсний хувцас шагнал "Мисс Монголиа 2006" тэмцээний дэд мисс Т.Ундармаа нь "Miss Interсontinental 2006" тэмцээнээс тусгай байрын шагнал гардаж байсан.

Харин "Мисс Монголиа 2009" тэмцээний тэргүүн мисс Х.Бадамгэрэл "Мисс Монголиа 2010" тэмцээний тэргүүн мисс Б.Бадамцэцэг нар "Miss International" дэлхийн гоо бүсгүй шалгаруулах тэмцээнд мөн адил эх орноо төлөөлөн оролцсон.

"Мисс Монголиа 2011" тэмцээний тэргүүн мисс И.Төгсөө "Miss International 2011" тэмцээнд Монгол Улсаа төлөөлж оролцон 79 орны миссээс "Second runner" буюу III байрын эзэн болж Монгол Улсын нэрийг дэлхийд гаргасан билээ.

Энэ жил "Мисс Монголиа 2012" тэмцээнийг өргөн цар хүрээтэйгээр зохион байгуулж олон охидыг хамруулах үүднээс ерөнхий зохион байгуулагчаар "Мисс Монголиа" холбоо МҮОНРТ дэмжигч байгууллагаар Монголын залуучуудын холбоо хамтран ажиллаж буй гэнэ.

Нэр хүндтэй тэмцээнүүдэд 2012 онд эх орноо төлөөлөн оролцох албан ёсны оролцогчдыг шалгаруулах "Мисс Монголиа 2012" тэмцээн өнөөдөр 20.00 цагаас УДЭТ-т болно.

Э.Цоож