Барилга, хот байгуулалтын сайд Ц.Даваасүрэн шинээр баригдаж байгаа төв цэвэрлэх байгууламжийн ажилтай өнөөдөр танилцлаа.

Улаанбаатар хотын Төв цэвэрлэх байгууламжийг шинээр барих төслийг БНХАУ-ын Засгийн газрын хөнгөлөлттэй зээлийн хүрээнд хэрэгжүүлэхээр шийдвэрлэсэн. Төслийн нийт хөрөнгө 300 сая ам.доллар юм.

Шинэ цэвэрлэх байгууламж нь хоногт 250000 м3 бохир ус хүлээн авч цэвэрлэх бөгөөд нийт 17,8 га талбайд төслийг хэрэгжүүлэхэд шаардлагатай барилга байгууламжийг барьж байгуулах аж. Мөн гадна автозам, явган хүний зам талбай, ногоон байгууламж бусад туслах барилга байгууламжаас бүрдсэн нийт 37 байгууламж баригдаж байна.

Барилга, хот байгуулалтын сайд Ц.Даваасүрэн "Барилгын ажил 18 сарын хоцрогдолтой байна. Цар тахлын улмаас барилгын материалын үнэ өссөн, тээвэрлэлт удааширсан зэрэг шалтгаан нөлөөлж байна. 

Гэсэн хэдий ч манай улсын барилга бүтээлтийн ажил улирлын онцлогоос хамаардаг тул төлөвлөсөн хугацаандаа ашиглалтад оруулахын тулд яаравчлах шаардлагатай. Тиймээс тээвэр, ложистикоос шалтгаалсан хүндрэлийг арилгахад анхаарна. 

Цэвэрлэх байгууламжийн ачааллыг нэмэгдүүлж, хүчин чадлыг бууруулдаг нэгж бол арьс шир, хүнсний үйлдвэрийн бохир. Тухайн үйлдвэрүүд өөр дээрээ цэвэрлэх байгууламжтай байх шаардлагатай. Шүүгээгүй бохирыг хүлээн авахгүй. Шинэ цэвэрлэх байгууламжийн систем нь ийм. Тиймээс хүргүүлсэн шаардлагын дагуу цэвэрлэх байгууламж бариагүй үйлдвэрийн үйл ажиллагааг хориглох зохицуулалттай.

Мөн Монгол Улсын Засгийн газар, АНУ-ын Мянганы сорилтын корпорацын хооронд байгуулсан Мянганы сорилтын II Компакт гэрээний санхүүжилтээр хэрэгжүүлж буй Хаягдал ус дахин боловсруулах төслийн хүрээнд шинэ ТЦБ-ийн дэргэд Ус дахин боловсруулах үйлдвэр, ус дамжуулах шугам системийн хамт байгуулж байгаа. Шинэ Төв цэвэрлэх байгууламж ашиглалтад орсноор энэ үйлдвэрийн хэвийн ажиллах нөхцөл бүрдэнэ. Ингэснээр, ДЦС-ууд хөргөлт, үнс зайлуулах зэрэг техникийн усны зарим хэрэгцээндээ гүний  цэнгэг ус биш, дахин боловсруулсан ус ашигладаг болох давуу талтай.

Барилгын шавийг 2020 оны есдүгээр сард эхлүүлсэн бөгөөд одоогоор 75 хувийн гүйцэтгэлтэй байна. Ирэх намар 95 хувьд хүргэх аж. Харин шаардлагатай барилгын голлох материалын татан авалт 95 хувь, тоног төхөөрөмжийн үйлдвэрлэл, худалдан авалт 60 хувьтай байна.

Мөн бараа материалын үнийн өсөлт, мөнгөний хашийн зөрүү гэх мэтээс шалтгаалж нийт хөрөнгийн 14 хувьтай тэнцэх санхүүжилт дутаж байгаа аж. 

Барилга угсралтын ажилд дотоодын барилгын туслан гүйцэтгэгч 10 компанийн 250 ажилтан, Хятадын 370 ажилчин оролцож байна.