БЗС-гаас гадаадын их, дээд сургуульд зээлээр суралцаж байгаа оюутны сургалтын төлбөрийг тухайн хүний хувийн дансанд шилжүүлсэн зөрчлийг арилгах талаар АТГ-аас 2022 оны нэгдүгээр сарын 7-ны өдрийн 02/353 дугаартай албан бичгээр мөрдөгчийн мэдэгдэл хүргүүлсэн бөгөөд өнөөдрийг хүртэл тодорхой үр дүнтэй арга хэмжээг аваагүй байна.

Угтаа бол зээлээр олгогдож байгаа сургуулийн төлбөрийг зөвхөн тухайн сургуулийн дансанд шилжүүлэх ёстой байдаг.

Тухайлбал гадаадад зээлээр сурч байгаа болон суралцсан нэр бүхий 17 хүний сургалтын төлбөр болох 835 мянга 173 ам.долларыг тэдгээр иргэдийн хувийн дансанд шилжүүлсэн зөрчлийг арилгах чиглэлээр арга хэмжээ авч нэг ч хүний төлбөрийг барагдуулаагүй байна.

Угтаа бол зээлээр олгогдож байгаа сургуулийн төлбөрийг зөвхөн тухайн сургуулийн дансанд шилжүүлэх ёстой байдаг.

Зээлийн мэдээлэл Шилэн сайтад нээлттэй ил болсон талаар ЦХХХ-ны сайд Н.Учрал өчигдөр мэдээлэхдээ "Боловсролын Зээлийн сан хүсэлтүүдийг хүлээн авч сонгон шалгаруулж, БШУЯ-д хүргүүлж, түүнийг нь Сангийн яам хянан явуулсныг Монголбанкнаас зээл олгох буюу сургалтын төлбөрийн гүйлгээг тухайн сургуулийн данс руу хийх ёстой. Хяная гэвэл маш ойлгомжтой, ил тод мэдээлэл. Энэ бол олон нийтийн хяналтаас гарах ямар ч боломжгүй мэдээлэл. Тиймээс БЗС-аас авсан зээл эргэн төлөгдөх нөхцөлтэй юм" гэсэн юм.

БЗС-ААС СУРАЛЦАГЧИЙН ХУВИЙН ДАНС РУУ БОЛОН ИЛҮҮ МӨНГӨ ШИЛЖҮҮЛСЭН ЗӨРЧИЛ
/Засгийн газрын 271-р тогтоол/

БЗС-гаас иргэний сургалтын төлбөр, замын зардлыг шилжүүлэхдээ холбогдох их, дээд сургуульд илүү шилжүүлсэн бөгөөд төлбөрийг буцаан төлүүлээгүй байна. Тодруулбал, 2015-2016 онд сангаас нэр бүхий гурван оюутны замын зардалд нийт 187 сая 301 мянган төгрөгийг илүү шилжүүлснээс 6 сая 546 мянган төгрөгийг буцаан төлүүлээгүй байна.

ДЭЛХИЙН ШИЛДЭГ 100 ИХ, ДЭЭД СУРГУУЛЬД БАКАЛАВРЫН ЗЭРЭГТ СУРАЛЦСАН 5 ОЮУТАНД АВСТРАЛИ, КАНАД ДОЛЛАРЫГ АМ.ДОЛЛАРООР БОДОЖ ИЛҮҮ ШИЛЖҮҮЛСЭН ЗӨРЧИЛ /Засгийн газрын 271-р тогтоол/

Мөн тухайн  хичээлийн жилд дэлхийн шилдэг 100 их, дээд сургуулийн бакалаврын түвшинд суралцаж байгаа 5 оюутны сургалтын төлбөрийг тухайн сургуулиас Австрали доллароор нэхэмжилсэн байна. Гэтэл нэхэмжилсэн төлбөрийг шилжүүлэхдээ 59,500 ам.долларын зөрүү үүсгэн илүү шилжүүлж үүнээс нэг оюутан 16,650 ам.долларыг буцаан төлсөн бол үлдсэн 4 оюутны 42,850 ам.долларыг өнөөдрийг хүртэл буцаан төлүүлээгүй байна. Тиймээс үндэслэлгүй шилжүүлсэн мөнгөн төлбөрийг улсын төсөвт буцаан төвлөрүүлэх ажлыг яаралтай зохион байгуулж, алдаа гаргасан ажилтнуудад зохих хариуцлага ногдуулахыг АТГ-аас Засгийн газрын хэрэг эрхлэх газарт даалгажээ.

Боловсролын зээлийн сангаас олгож байгаа зээл, тэтгэлэгтэй холбоотой зарим баримт, материалыг үзэх боломжгүй буюу хязгаарлагдмал байсан талаар АТГ-ын зөвлөмжид дурджээ.