УИХ-ын гишүүн О.Цогтгэрэл сурагчдын чанарыг үнэлэх олон улсын PISA-2022 үнэлгээний Монгол Улсын үр дүнгийн талаар Ерөнхий сайдад асуулга тавьжээ. Асуулгын хариуг БШУ-ы сайд Л.Энх-Амгалан өнөөдрийн үдээс өмнөх хуралдаанд өгсөн юм,

Сайд Л.Энх-Амгалан,  Монгол Улсад нэг суралцагч суурь боловсрол эзэмшихэд 12600 доллар зарцуулж байгаа нь дэлхийн 81 орноос дороосоо гуравдугаарт орж байна. Гэтэл манай улсаас хэд дахин илүү мөнгө зарцуулдаг орны 15 настай хүүхдийн математикийн гүйцэтгэлийн үзүүлэлт монгол хүүхдүүдээс доогуур байгаа дүн гарсан.

Нэг хүүхдэд суурь боловсрол эзэмшүүлэхэд 75 мянган ам.доллараас багагүй мөнгө зарцуулдаг орнуудын зарцуулсан мөнгө, математикийн гүйцэтгэл хоёр хамааралтай байгаа нь Монгол Улс боловсролд илүү мөнгө зарцуулбал үр дүн гарахыг илтгэн харуулж байна. Боловсролын дэд бүтэц, дижитал төхөөрөмж хангалтгүй байгаа нь сургалтын чанарт сөргөөр нөлөөлж болзошгүй байна. Гэхдээ нэг сурагчид зарцуулах төсөв бага байгаа ч монгол хүүхдүүдийн гүйцэтгэл хангалттай үнэлэгдсэн.

Цаашид анхаарах нь Засгийн газраас PISA-2022 шалгалтын үр дүнд үндэслэн улсын хэмжээнд боловсролын чанарыг сайжруулах, хот хөдөөгийн сургуулийн ялгааг арилгах зорилгоор дараах арга хэмжээг авахаар зорин ажиллаж байна. Үүнд, цэцэрлэг, ЕБС-ийн сурагчдын эх хэл болон унших суурь чадварыг сайжруулахад чиглэсэн зорилтот арга хэмжээний төлөвлөгөө батлан хэрэгжүүлэх, ЕБС-ийн сургалтын хөтөлбөрт үнэлгээ хийж, сургалтын хөтөлбөрт өөрчлөлт оруулах, шинжлэх ухаан, математик, байгалийн ухаан, англи хэлний цахим сурах бичиг, контентийн санг нэмэгдүүлэх зэрэг арга хэмжээ авах болно.

Монгол Улс олон улсын PISA үнэлгээнд оролцсоноор 15 настай суралцагчийн мэдлэг чадвараа амьдралд хэрхэн хэрэглэж байгааг тогтоон үндэсний хэмжээний мэдээллийн сантай болох, өөрийн орны боловсролын чанарыг дэлхийн бусад орныхтой харьцуулах, үр дүнд суурилсан сургалтын хөтөлбөрийг боловсруулах шаардлага тулгарч байна гэв. 



Мэдээлэлтэй холбогдуулан УИХ дахь цөөнхийн бүлгийн дарга О.Цогтгэрэл үг хэллээ.

Тэрбээр, PISA үнэлгээ нь 15 настай суралцагчид эх хэлээрээ уншиж ойлгох, математик болон байгалийн ухааны мэдлэг чадвараа амьдралд хэрхэн хэрэглэж байгаа чадварыг тухайн улсын боловсролын тогтолцоо хэр хэмжээнд олгож байгааг тандан судалдаг онцлогтой.

Унших чадварын хувьд манай улсын судалгаанд оролцсон гурван  сурагч тутмын хоёр нь юу уншсанаа ойлгохгүй байна гэнэ. Монгол Улсаас уншсан зүйлээ бүрэн дүүрэн ойлгох, өөрөөр хэлбэл уншсан зүйлээ топ гүйцэтгэлтэй сурагч 7000 сурагчаас нэг ч байгаагүй. Гэтэл бусад орны сурагчдын долоо орчим хувь нь топ гүйцэтгэлийн үнэлгээ авсан байна.