Францын нэрт эрдэмтэн судлаачдын баг эрхэлдэг "Дэлхийн нэг шүлгийн ном"-д хүн төрөлхтний оюун сэтгэлгээ, мэдрэмжийн охь дээж болсон бүтээлүүдийг хоёр жил тутамд нэг удаа шалгаруулж зөвхөн нэг л шүлгийг сонгож ном бүтээдэг билээ.

Энэ удаа Дэлхийн урлаг соёлын академийн байнгын гишүүн, зохиолч, яруу найрагч Д.Урианхайн бүтээл "Дэлхийн нэг шүлгийн ном"-д багтжээ.

Тодруулбал, "Инээд шиг хуучин хүний амьдралд" хэмээх зохиолчийн өөрийнх нь тодотгосноор постмодерн авангард чиглэлийн шүлэг нь хэвлэгдсэн байна.

"Дэлхийн нэг шүлгийн ном"-д Д.Урианхай найрагчийн бүтээл орсноор Ази тивээс анх удаагийнх нь болсон аж. Хятад, Япон, Солонгос, Энэтхэгийн найрагчид зохиол бүтээлээ явуулж байсан ч шалгарч чадаагүй аж.

Д.Урианхай: Инээд шиг хуучин хүний амьдралд

Инээд шиг хуучин хүний амьдралд
Нулимс шиг халуун байх!
Маргааш шиг ойрхон байх!
Магад ирэх Үхэл шиг
Давтагдахгүй байх!...
Нулимс шиг хуучин хүний амьдралд
Мөрөөдөл шиг гэгээн байх!
Хайргүй хүндээ ч хайр олох!...
Харагдахгүй Бурхан,
Мартагдахгүй гомдолдоо
Уйлахгүй тэсэхээр цайлган байх!
Гомдол шиг хуучин хүний амьдралд
Харагдахгүй Бурхан шиг ил байх!
Өнөөдрийнх шиг уйтай өдрийг
Дахиад яасан ч тэвчихээргүй
Тэсрэмтгий байх!
Өчигдрийнх шиг,
Уржигдрынх шиг
Утгагүй тарчилгах удаан өдрөөс
Дахиад яасан ч амьд үлдэхээргүй
Тэрсүүд байх!
Инээд шиг хуучин...
Нулимс шиг хуучин...
Гомдол шиг хуучин...
Харагдахгүй Бурхан шиг...
Хүний амьдралд
"Байхгүй юм" шиг нь
Үргэлж шинэ байх!
"Байгаа" бүгдээс нь
Мөнхөд өөр байх!...