Баянгол дүүрэг IV хорооллын нутаг дэвсгэрт байрлах "Нарлаг" дэлгүүрийн ард талын "Баялаг" төвийн III, IV давхарт өчигдөр 10:00 цагийн орчимд гал гарлаа. Гал гарсан даруйд иргэд Онцгой байдлын албанд мэдээлэл өгчээ.

Тухайн газарт Аврах, гал унтраах 10, 26 дугаар ангийн таван машин, 30 гаруй хүний бүрэлдэхүүнтэй баг ажилласан юм. Албаны эх сурвалж хэлэхдээ "Дотор утаажилт ихтэй байна. Одоогоор аврагч нар хайгуулын ажил явуулж байна. Галыг бүрэн унтраасны дараа шалтгааныг нь тогтооно. Гал гарах үед барилга дотор үйл ажиллагаа явуулж байсан газар байхгүй" гэлээ.

Шатсан барилгад "Ku damm" ресторан, "Могул" дэлгүүр, “Гурван ган өд” авто сургууль, "Kenzo 999" караоке, "Best Mother" сургалтын төв, "Shine" билльярдын төв, "I Love 3D Movie" кино театр зэрэг газрууд үйл ажиллагаа явуулдаг байжээ.

"Баялаг" төвийн гаднах авто зогсоолын манаач ярихдаа "Энэ цахилгааны утаснаас л болж гарсан байх. Өглөө эрт гарсан гал. 09:00 цагийн үед цонхноос нь утаа гарч байсан. Тэгээд хүмүүс дуудлага өгсөн. Гал их гараад унавал хүний олон машинуудыг яанаа л гэж бодсон" хэмээв.

Харин өөр нэг эх сурвалж "Дээр байрладаг "I Love 3D Movie" кино театрынхан олноор нь залгаж цахилгааны утсаа орхисноос гал гарсан байх. Тэрнээс биш өөр гал гарах шалтгаан байхгүй" хэмээн ундууцан яваад өгөв.

Тус барилга нь 2004 онд ашиглалтад орж өдгөө олон газрууд үйл ажиллагаа явуулдаг байжээ. Ойр хавийн иргэд "Ямар их тортог вэ" гээд ам хамраа таглана. Гал гарсан шалтгааныг тогтоохоор мэргэжлийнхэн ажиллаж байна.

Б.Чанцал