Зам тээврийн осол хэрээс хэтэрч, гамшгийн хэмжээнд хүрээд байна. Жолооч нарын сахилга батгүй, согтуугаар автомашин жолоодох, дүрэм зөрчих зэрэг нь хүний амь насанд халдах хэрэг болж буйг төдийлөн ухаарахгүй байх шиг.
Өнгөрсөн долоо хоногт зам тээврийн ослоор 12 хүний алтан амь үрэгдсэн бол зөвхөн өчигдөр гэхэд л найман хүн амиа алджээ.

Сонгинохайрхан дүүргийн нутаг Таван шарын автобусны буудлын урд замд Hyundai Accent маркийн автомашины жолооч Ө нь явган зорчигч, 52 настай М-ийг мөргөж, амь насыг нь хохироосон хэрэг гарсан байна.
Хэнтий аймгийн Жаргалтхаан сумын нутаг Хамар давааны зүүн талын Зөөлөн гэдэг газар амины Toyota Landcruiser маркийн А жолоочтой автомашин онхолдож, зорчигч, 55 настай А, 23 настай Ц, 33 настай Б, гурван сартай нэг хүүхэд, нийт 4 хүн амиа алдаж, хоёр хүн гэмтсэн байна.

Булган аймгийн Хангал сумын нутагт Hyundai Accent маркийн автомашин онхолдож, жолооч 49 настай Б, зорчигч 47 настай О нарын хоёр хүн нас баржээ.

Говьсүмбэр аймгийн Баянчандмань сумын хоёрдугаар багийн нутаг 16-р зөрлөг орчимд Toyota автомашин онхолдож 41 настай Э амиа алджээ.

Дээрх хүний амь нас эрсэдсэн ослын ихэнхи нь орон нутгийн замд гарсан байна. Хөдөө, орон нутагт гарч байгаа зам тээврийн осол ихэвчлэн онхолдох хэлбэрээр гарч байна. Ослын шалтгаан нөхцөл нь хурд хэтрүүлэх, согтуугаар тээврийн хэрэгсэл жолоодох, анхаарал болгоомжгүй явах зэргээс үүдэлтэй байгаа юм.

Тиймээс орон нутгийн замд явахдаа замынхаа нөхцөл байдалд тохируулан хурдаа зөв сонгох, замын хөдөлгөөний дүрмээ баримтлан хөдөлгөөнд оролцохыг анхааруулж байна.

М.Жаргал