Украины ерөнхий сайд асан Юлия Тимошенкотой зүй бусаар харьцаж байгааг эсэргүүцэн Их Британийн сайд нарын танхимын гишүүд Европын хөлбөмбөгийн аварга шалгаруулах тэмцээний Английн шигшээгийн хэсгийн гурван тоглолтыг үзэхгүй гэдгээ мэдэгдсэн байна.

Гэхдээ Засгийн газар Английн шигшээ багийг бүрэн хэмжээгээр дэмжиж буйгаа илэрхийлжээ.

Өмнө нь Юлия Тимошенкогийн охин  Евгения BBC-д өгсөн ярилцлагадаа “хүний эрхийн төлөө улстөрийн бойкот хийж, (Украины ерөнхийлөгч) Януковичтай гар барихыг хүсэхгүй байгаа Европын тэргүүдийг би ойлгож байна” гэжээ.

Гэвч Евгения Тимошенко тэмцээн явагдах ёстой гэж үзсэн байна. Учир нь түүний ээж “Евро-2012”-ын эрхийг авахын тулд их ажил хийсэн гэдгийг тэмдэглэжээ.

Өнгөрөгч дөрөвдүгээр сарын 20-ны өдөр Юлия Тимошенког хорих газраас эмнэлэг рүү албадан зөөвөрлөх үед түүнд хорихын ажилтнууд гар хүрч, зодсон хэмээн мэдэгдэж байсан бөгөөд түүний биеийн хөхөрч гэмтсэн хэсгүүдийн зургууд хэвлэлээр нийтлэгдэж байсан юм. Харин Украины ерөнхий прокурор дээрх мэдээллийг няцааж байв.

Үүнтэй холбогдуулан европын зарим улстөрчид хоригдож байх хугацаанд нь Тимошенкотой харгис хэрцгий хандсанд Украинд болох Европын аварга шалгаруулах тэмцээнийг бойкотлоно гэж мэдэгдэж байсан юм.  

Юлия Тимошенкогийн хэргийн улмаас Украинд болох тэмцээнийг бойкотолж байгаа улстөрчдийн дунд  Евро комиссийн ерөнхийлөгч Жозе Мануэль Баррозу хүртэл байгаа аж.

Украин дахь Европын холбооны төлөөллийн мэдээлснээр еврокомиссаруудын хэн нь ч “Евро-2012”-ын үйл ажиллагаанд оролцохгүй гэнэ.

А.Цацрал