“Халуун мэдээ” сэтгүүл зочны хоймортоо"Хамтдаа туулъя гэсэн юмаа", "Хайрын орчлон", "Хайрын мишээл" зэрэг олон сайхан дууг амьдруулж олны хүндэтгэлийг хүлээсэн Монгол улсын соёлын тэргүүний ажилтан, дуучин Б.Энхмэндийг урьж ярилцжээ.

-Хүмүүс таны нүдийг чинь их сайхан гэдэг. Таныхаар өөрийг чинь чимдэг зүйл юу вэ?
Миний хувьд илүү дутуу зан байдаггүй минь л юм болов уу. Элдэв маяг байхгүй, хаана ч явсан дасан зохицох чадвартай байдаг маань чимдэггүй юмаа гэхэд нэг давуу тал минь юм болов уу.

-“Хайрын орчлон” дуу чинь олон хүний дуртай дуу болсон. Тэгвэл өөрөө аль дуундаа илүү дуртай вэ?
Дуу болгон маань сайхан санагддаг. Надад хамгийн их хөрөнгө оруулалт хийсэн уран бүтээл минь зохиосон "Хамтдаа туулъя гэсэн юмаа" гэдэг дуу юм. Бас нутгийнхаа ойд зориулж хийсэн "Эргэн төрмөөр нутаг" гээд шинэ уран бүтээл маань их сайхан болсон байгаа.

-Нөхөр нь яруу найрагч юм чинь дуу олдохгүй гэх зовлон байдаггүй байхдаа?
Хүмүүс гоё дууныхаа шүлгийг эхнэртээ өгдөг гэж ярьдаг гэсэн. Манай хань чинь надад тийм ч олон дуу өгч байгаагүй. Чинболор бид хоёрын уран бүтээлд бол манай хүний шүлэг нилээд бий.

-Нөхөр чинь танд дууны шүлэг өгөөд байна гэдэг том бэлэг. Харин таны ханьдаа барьж байсан хамгийн том бэлэг юу байв?
Ер нь ханийгаа үргэлж л баярлуулж, сэтгэл хангалуун байлгах юмсан гэж боддог. Би угаасаа романтик сэтгэлгээ багатай учраас тийм сюрприз энэ тэр бариад гайхшруулаад байдаггүй байх. Бид хоёрын нэг нэгэндээ өгсөн хамгийн том бэлэг маань хөөрхөн охин минь юм даа.

-Гэр бүлийн хүмүүс муудаж сайдах зүйл тохиолддог л байх. Хэн нь буулт хийдэг вэ?
Бид хоёр чинь хоёулаа л зөөлөн талдаа. Асуудал үүслээ гэхэд хурцдаад байдаггүй намжчихдаг. Уур хүрэхээрээ дуугаа хураачихдаг, дараа нь "тэгэхэд та тэгж хэлсэн болохоор би ингэлээ" гээд л ярилцдаг.

-Нөхрийгөө "та" гэж хэлдэг юм уу?
Тиймээ. Хүмүүс заримдаа "чи тийм хөгшин хүнтэй суучихсан юм уу" гэдэг. Бид хоёр чинь дөрвөн насны л зөрүүтэй. Миний ээж аавыг маань чи гэж огт дуудаж байгаагүй болохоор би аяндаа л нөхрийгөө "та" гэж хэлээд сурчихсан. Анх оюутан байхдаа уран бүтээлч ахыг "та" гэж танилцаад тэр хэвээрээ л яваа...

Та үргэлжлэлийг “Халуун мэдээ” сэтгүүлээс уншихыг хүсвэл ЭНД дарна уу.

Дашрамд дуулгахад “Халуун мэдээ” сэтгүүлийн бүх дугааруудыг Үндэсний портал GoGo.mn сайтын Электрон ном булангаас унших боломжтой.

Харин та Электрон номыг ашиглахын тулд компьютер дээрээ Adobe Digital Editions программыг суулгасан байх шаардлагатайг анхаарна уу. Зааврыг ЭНД дарж үзээрэй.