Говь-Алтай аймагт амьдралын түвшнээс доогуур орлоготой ард иргэдийн амьдрах орчин улам бүр доройтох болжээ.

Ялангуяа шатахууны үнэ өссөнөөс болж, өргөн хэрэглээний барааны үнэ нэмэгдсэн нь амьдралд хүндээр тусч байгаа аж.

Энэ үед Аймгийн Засаг дарга С.Амгаланбаяр, мэргэжлийн хяналтын дарга Ч.Гаваа нар үгсэн хуйвалдаж Дэлгэр сум дахь Хөв булагийн нүүрсний уурхайг гэнэт хаалгасан нь мод, түлээ ховор Говь-Алтай аймгийн гэр хорооллын ард иргэдэд хямд үнэтэй нүүрс түлэх, амьдралаа залгуулах боломжгүй болгожээ.

Аймгийн төв дээр нэг кг нүүрс 60 төгрөг байдаг байсан бол одоо 160 төг болтлоо огцом өссөн нь тус аймгийн иргэд амьдран суух аргагүйд хүргэжээ. Үнэндээ аймгийн дарга нарт нь нүүрс хэрэггүй байж болно. Гэхдээ ард иргэдэд нүүрс нэн шаардлагатай байгааг үл анзаарч байгаад иргэд бухимдаж байна.

Аймгийн Засаг дарга С.Амгаланбаярт аймгийн иргэд хандаж та өвөлжилтийн бэлтгэлийн байдалд онцгой анхаараач ээ, ядарсан иргэд чинь нүүрсээ хаанаас авах вэ гэдгийг нэн даруй яаралтай шийдвэрлэж өгөхийг хүсч ил захидал илгээгээд байгаа аж.

Шатахууны үнийг нефть импортлогчид. үгсэн нэмсэн гэгдэж байсан бол Говь-Алтай аймагт нүүрсний үнийг Засаг дарга С.Амгаланбаяр ийнхүү нэмжээ. Үүнээс болж нутгийн зон олон ядуурлын туйлд хүрэхдээ тулжээ. Тиймээс нүүрсний үнийг Цагаан сараас өмнө яаралтай хямдруулж өгөхийг иргэд Засаг даргаасаа хүсч сууна.

Аймгийнхан Зээгт, Мааньтын уурхайгаас хэрэгцээнийхээ нүүрсийг нэгэнт авах боломжгүй, тээврийн зардал үнэтэй тусч байгааг аймгийн дарга нар нь ойлгохгүй байгаа тул энэ талаар яаралтай хариу өгөхийг нутгийнхан нь шаарджээ.

Б.Анхмаа