Зам тээврийн хөгжлийн сайд Л.Халтар өнгөрсөн лхагва гарагт төмөр замын салбарт хэрэгжүүлэх төслүүдийг танилцуулсан. Эдгээр нь Зүүн баян өртөөнөөс Ханги мандал чиглэлийн төмөр зам, Дорнод аймгийн Чойбалсан хот-Хөөт Бичигт буюу зүүн босоо чиглэлийн 237 км төмөр зам, Арц суурь-Шивээ хүрэн чиглэлийн, баруун босоо чиглэлийн 1280 км төмөр зам, Рашаант өртөө-Богд хаан төмөр зам юм.

Эдгээр төслийг хэрэгжүүлэхэд нийт 600-700 сая ам.долларын хөрөнгө шаардлагатай. Дотоод эх үүсвэрээс гадна ОХУ, Япон Улсаас зээл авна гэж салбарын сайд мэдэгдсэн. Тэгвэл Засгийн газар өнгөрсөн сард тогтоол гарган,  “Төрийн өмчийн концессын зүйлийн жагсаалт”-д өөрчлөлт оруулжээ. Энэ оны долдугаар сарын 20-ны өдрийн тогтоолд “Концессын тухай хуулийн 6.1.1, 10.1-д заасныг тус тус үндэслэн Монгол Улсын Засгийн газраас ТОГТООХ нь:

Засгийн газрын 2013 оны 9 дүгээр сарын 6-ны өдрийн 317 дугаар тогтоолын хавсралтаар баталсан “Төрийн өмчийн концессын зүйлийн жагсаалт”-д дор дурдсан агуулгатай 535, 536, 537 дугаар заалт тус тус нэмсүгэй” гэжээ. Хуулийн этгээд нь өөрийн болон өөрийн боломжоор олсон хөрөнгөөр өргөн царигийн (1520 мм) төмөр замыг дагалдах дэд бүтцийн хамт барьж, концессын гэрээнд заасан хугацаанд ашиглан гэрээний хугацаа дуусахад төрд үнэ төлбөргүй шилжүүлнэ. Зураг төсөл боловсруулах-барих- ашиглах-шилжүүлэх  нөхцөлтэй байх юм.

Төмөр замын төслүүд
53-5 Хөөт-Чойбалсан чиглэлийн төмөр зам төсөл-193 км
53-6 Хөөт-Бичигт чиглэлийн төмөр зам төсөл-222 км
53-7 Зүүнбаян-Ханги чиглэлийн төмөр зам төсөл-280 км

Энэ тогтоолын 1-т заасан концессын төсөл сонгон шалгаруулах уралдаант шалгаруулалтыг холбогдох хууль, журмын дагуу зохион байгуулахыг Шадар сайд С.Амарсайхан, Төрийн худалдан авах ажиллагааны газрын дарга Х.Улам-Өрнөхт даалгасан байна.

Концессын тухай хуулийн 6.1.1 болон 10.1-т Төсвийн тухай хуулийн 33.2.9-т зааснаас бусад төрийн өмчийн концессын зүйлийн жагсаалтыг батална гэжээ.