НҮБ-ын Хүүхдийн Сангийн подкастын ээлжит дугаарт тус сангийн Боловсролын ахлах мэргэжилтэн Н.Цэрэннадмид оролцлоо.

Энэ удаагийн дугаараас орон нутгийн хүүхдүүдэд чанартай боловсрол хүргэх тал дээр НҮБ-ын Хүүхдийн Сангаас хэрхэн шинэлэг шийдлүүдийг хэрэгжүүлж байгаа болон Энэтхэг, Японд сурч, ажиллаж байсан түүний туршлагын талаарх сонирхолтой яриаг хүлээн авч үзээрэй.

Тэрээр "Бид цаашид юу хийх вэ гэж ярихаас илүүтэй асуудал хаана байгааг эхлээд харах ёстой. Алслагдсан нутагт байгаа хүүхдүүдэд боловсролыг хүргэнэ гэдэг Монгол Улсын хувьд үргэлж чухал асуудал.

Олон Улсын “PISA” үнэлгээ гэж бий. Энэ нь 15 настай хүүхдүүдийн шинжлэх ухаан, математик, унших чадварыг нь үнэлдэг юм. Тус үнэлгээгээр Монгол хүүхдүүд “хоцрогдолтой” гэж гарсан. Тэр дундаа унших болон хэлний чадвар нь муу байна. Цааш нь илүү нарийвчлан үзвэл хот, хөдөөгийн ялгаа асар их.

Хөдөө, тэр дундаа сумдад амьдарч байгаа хүүхдүүд аймгийн төвд байгаа хүүхдүүдээс 1,5 жилээр хоцрогдолтой.

Хотод байгаа хүүхдүүдээс 2,5 жилийн хоцрогдолтой байна. Энэ нь алслагдсан баг, сумдад байгаа хүүхдүүд ихээхэн хоцрогдолтой байгаа нь харагдаж байна.

Мөн НҮБ-ын Хүүхдийн Сангаас явуулдаг "Нийгмийн үзүүлэлтийн түүвэр судалгаа" гэж бий. 2023 оны судалгааны үр дүнг харахад, Монгол гурван хүүхэд тутмын нэг нь уншиж, энгийн тоо бодож чадахгүй байна гэж гарсан.

Энэ тоо өмнөх 2018 оны судалгаатай харьцуулахад сайжирсан хэдий ч нэлээдгүй хүүхэд анхныхаа суурийг зөв тавьж чадахгүй байна гэдгийг харуулж байна.

Хүүхэд сууриа зөв тавихгүй болохоор дараа дараагийнхаа түвшинд бусдыгаа гүйцэж чадахгүй байна гэсэн үг. Ер нь хүүхдийн унших чадвар гуравдугаар ангид нь төлөвшсөн байх ёстой юм. Тэгж чадахгүй бол тухайн хүүхэд хоцрогдолд орох магадлалтай гэж үздэг" гэв.